У Польшчы за кантрабанду цыгарэтаў у беларуса канфіскавалі аўтамабіль
14- 20.05.2024, 21:27
- 10,884
![У Польшчы за кантрабанду цыгарэтаў у беларуса канфіскавалі аўтамабіль](https://i.c97.org/ai/595827/aux-head-1716229648-20240101_swec_360.jpg)
Цыгарэты знайшла галандская аўчарка Чыка.
У Польшчы галандская аўчарка Чыка, навучаная выяўляць тытунёвыя вырабы, знайшла ў аўтамабілі беларуса кантрабандныя цыгарэты, паведамілі ў Мытна-падатковай службе.
Супрацоўнікі службы спынілі ў Аўгустове для праверкі Ford з беларускімі рэгістрацыйнымі знакамі. Яны западозрылі, што ў аўто можа быць схаваная кантрабанда.
![](https://i.c97.org/ai/595827/aux-1716229655-111.jpg)
У ператрусе аўтамабіля ўдзельнічала галандская аўчарка Чыка, навучаная выяўляць тытунёвыя вырабы. Сабака знайшоў у элементах колавых арак, салона і мадыфікаваным глушыльніку 1223 пачкі беларускіх цыгарэтаў. Арыентавальны рынкавы кошт канфіскаванай кантрабанды – амаль 20000 злотых (блізу 5100 даляраў).
На 35-гадовага беларуса распачалі крымінальную справу, яму пагражае штраф. Цыгарэты і аўтамабіль канфіскавалі.