У Беларусі прынялі рэзанансны закон аб прадпрымальніках

Што зменіцца?

Дыктатар Аляксандр Лукашэнка падпісаў закон пра пытанні прадпрымальніцкай дзейнасці. Як і планавалася, чыноўнікі зрэжуць спіс відаў дзейнасці для ІП. Тым, хто не трапіць у гэты пералік, давядзецца або зачыніцца зусім, або перайсці ў юрыдычную асобу.

Віды дзейнасці, якія змогуць ажыццяўляць індывідуальныя прадпрымальнікі, да 1 ліпеня павінен будзе вызначыць урад. «У відах дзейнасці, якія не ўвойдуць у запланаваны пералік, з 1 кастрычніка спыняецца рэгістрацыя новых індывідуальных прадпрымальнікаў», – паведамляе прэс-служба Лукашэнкі.

Тым, хто раней адкрыў ІП у гэтых відах дзейнасці, да 31 снежня 2025 года трэба будзе перайсці ў юрыдычную асобу. Яшчэ адзін варыянт – зусім зачыніцца.

«Пры гэтым для такіх прадпрымальнікаў уводзіцца спрошчаны парадак пераходу ў камерцыйныя арганізацыі з пераемнасцю ва ўсіх правах і абавязальніцтвах перад бюджэтам і контрагентамі», – удакладняе прэс-служба палітыка.

«Закон прадугледжвае новыя віды фінансавай падтрымкі, уключаючы пакрыццё з бюджэту часткі капітальных затратаў пры рэалізацыі інвестпраектаў з удзелам крэдытаў Банка развіцця Беларусі, – паведамляе прэс-служба ўзурпатара. – Акрамя таго, пашыраецца права на атрыманне дзяржаўнай фінансавай падтрымкі для суб'ектаў сярэдняга бізнэсу. Раней гэты інструмент быў даступны толькі для малога бізнэсу».

Нагадаем, гэта не першая спроба чыноўнікаў урэгуляваць працу прадпрымальнікаў. Раней Аляксандр Лукашэнка заяўляў, што ў перспектыве пацісне руку апошняму ІП.

Байдэн у размове з Зяленскім даў два важныя абяцанні

Чаго чакаць Украіне.

Прэзідэнт Украіны Уладзімір Зяленскі сёння, 22 красавіка, правёў размову са сваім амерыканскім калегам Джо Байдэнам. Яны абмяркоўвалі пастаўкі зброі, у якой маюць патрэбу УСУ.

Пра гэта паведамляе старонка Зяленскага ў Telegram.

Байдэн запэўніў Зяленскага, што неадкладна падпіша закон аб дапамозе Украіне ў выпадку ягонага ўхвалення Сенатам ЗША. Зяленскі падзякаваў Байдэну за неаслабную падтрымку Украіны і за сапраўднае глабальнае лідарства.

«Я таксама адзначыў двухпартыйную падтрымку законапраекта і асабістую ролю спікера Майка Джонсана і лідара меншасці Хакіма Джэфрыса. Іншая пастанова Палаты прадстаўнікоў – дазволіць канфіскацыю расейскіх актываў – пасылае магутны сігнал усім нашым партнёрам», – піша Зяленскі.

Зяленскі расказаў Байдэну пра расейскі паветраны тэрор тысячамі ракетаў, дронаў і бомбаў. Сярод іншага, пра ўдар па тэлевежы ў Харкаве, які адбыўся літаральна за некалькі хвілінаў да размовы. Прэзідэнт Украіны ўпэўнены, што гэта дакладны намер Расеі зрабіць горад непрыдатным для жыцця.

Прэзідэнты абмеркавалі першы пакет абароннай дапамогі, які ЗША перададуць Украіне пасля прыняцця закону. Байдэн запэўніў, што ён будзе хуткім і магутным і ўзмоцніць нашы супрацьпаветраныя, дальнабойныя і артылерыйскія магчымасці.

Таксама яны абмеркавалі падпісанне двухбаковага пагаднення ў бяспецы і падрыхтоўку да будучага Саміту міру.