Сплаў дэменцыі з маразмам

Як Пуцін з Лукашэнкам надумалі патрэсці сваімі комплексамі.

Крэмль пасля доўгай паўзы зноў звярнуўся да ядзерных пагрозаў. Так, днямі акупанты абвесцілі пра вучэнні з ужываннем тактычнай ядзернай зброі. А беларускі фюрар Лукашэнка заявіў пра раптоўную праверку ядзернай зброі. Пра тэхнічныя асаблівасці вучэнняў з ужываннем ТЯЗ і поўную катастрофу з ядзернай зброяй у Беларусі – у эфіры «Апостроф TV» расказаў эксперт ва ўзбраеннях Алег Каткоў.

– Вучэнні з выкарыстаннем нестратэгічнага ядзернага ўзбраення – гэта максімальна рэдкая рэч. Яна незвычайная і выбіваецца з таго, што рабіла Расейская Федэрацыя, скажам, за апошнія 10 гадоў.

Дый акцэнт на гэтых вучэннях таксама нестандартны. Бо звычайна, калі абвяшчаліся вучэнні з ядзерным узбраеннем, то, вядома, гаворка ішла пра стратэгічнае ядзернае ўзбраенне, прызначанае для знішчэння чалавецтва. Гэта значыць, параза ЗША, знішчэнне ўсіх гарадоў, прамысловых цэнтраў. Або Еўропы – не гэтак важна.

Аднак калі размова ідзе пра тактычнае ўзбраенне, то трэба разумець, што гэта зброя прызначаная для аператыўна-тактычных задачаў. І знаходзіцца ў распараджэнні практычна найніжэйшага камандавання ва ўмовах агульнавайсковага кіравання Расеі. Такая зброя прызначаная для дасягнення цэляў непасрэдна на полі і ў зоне да 1000 км.

Што да ядзернага ўзбраення як такога, важна, што гэтыя вучэнні павінны прайсці ў паўднёвай ваеннай акрузе. Гэта акруга, якая не толькі мяжуе з Украінай, але і тэрытарыяльна знаходзіцца на акупаваных тэрыторыях Украіны. Пры гэтым будуць задзейнічаныя авіяцыя, ваенна-марскія сілы.

Што менавіта гэта будзе – пакуль невядома. Але калі размова ідзе пра паўнацэнную адпрацоўку, то гэта азначае, што будзе адпрацаваны такі аспект, як дастаўка ядзернага ўзбраення. Паколькі гэтыя боепрыпасы захоўваюцца на спецыяльных базах ядзернага ўзбраення. І гэта даволі складаны працэс, які патрабуе вялізнай арганізацыі. Задзейнічаная вялікая колькасць разнастайных структураў для вымання боепрыпасу са склада, яго транспартавання і размяшчэння на носьбіце. Таксама гэты працэс патрабуе значнай абароны, захавання рэжыму таемнасці і г.д. І нават у СССР такія вучэнні праводзіліся нячаста – раз на некалькі гадоў – таму што гэта даволі маштабнае мерапрыемства.

І тут важны аспект заключаецца ў тым, што выведкі іншых краінаў не ведаюць, ці транспартуюцца рэальныя ядзерныя боепрыпасы, ці іх макеты. Таму такія вучэнні ў часы СССР былі даволі рэдкімі і выклікалі дадатковую напругу ў часы «халоднай войны».

Што тычыцца вучэнняў, пра якія заявілі ў Беларусі – яны аналагічныя ў сутнасці. Але як бы там ні было, ядзерная зброя ў Беларусі – гэта крыху пацешна. Рэч у тым, што ў размове дэменцыі з маразмам – калі Пуцін з Лукашэнкам дамаўляліся пра ядзерную зброю – яны не маглі дамовіцца пра самалёт. То-бок гэтыя дыктатары не маглі нават узгадніць, пра які носьбіт ідзе гаворка.

У выніку беларусам давялося інтэграваць ядзерную зброю пад Су-25, які з'яўляецца штурмавіком, дагукавой машынай і нават у часы СССР не быў прызначаны для таго, каб несці ядзерную зброю ў выглядзе бомбаў свабоднага падзення ў прынцыпе. Але дэменцыя з маразмам узгаднілі гэта, і таму беларусам давялося інтэграваць ядзерны боепрыпас пад штурмавік Су-25. Пры гэтым пілот гэтага самалёта становіцца камікадзэ, таму што ён ніякім чынам не зможа выканаць скід ядзернага боепрыпасу і адысці ад зоны паразы. Гэта проста фізічна не магчыма, таму што адзіная тактыка скіду такога боепрыпасу – гэта падыход на звышгукавой хуткасці на мінімальнай вышыні, а пасля скіду ажыццяўляецца максімальны манеўр з выхадам на фарсаж. А ў Су-25 нават фарсажу няма, там максімальная хуткасць крыху большая за 800 км/г. Але расейцы з беларусамі ўпарта прадаўжаюць гаварыць, што інтэгравалі ядзерныя боепрыпасы пад гэты самалёт.

І другая кампанента, якая фармальна перададзеная ў Беларусь – гэта ядзерныя баявыя часткі да АТРК «Іскандэр». Гэта балістычныя і крылатыя ракеты, якія трэба ўспрымаць больш сур'ёзна. Але калі мы гаворым пра беларускую ядзерную зброю, то трэба разумець, што яе як такой няма – гэта расейская зброя і кантроль за ёй застаецца менавіта ў Расеі.