Шольц перасцярог Кітай ад ваеннай падтрымкі Пуціна
9- 15.04.2024, 21:17
- 7,292
![Шольц перасцярог Кітай ад ваеннай падтрымкі Пуціна](https://i.c97.org/ai/465370/aux-head-1651156252-20220428_szolc_360.jpg)
Канцлер ФРГ правёў у Шанхаі некалькі сустрэчаў і зрабіў шэраг заяваў.
Федэральны канцлер Олаф Шольц (Olaf Scholz) падчас другога дня свайго трохдзённага візіту ў Кітай у панядзелак, 15 красавіка, перасцярог улады краіны ад любой ваеннай падтрымкі Расеі, паведамляе «Нямецкая хваля».
– Ніхто не павінен спрыяць таму, каб гэта атрымалася, – заявіў у Шанхаі Шольц, маючы на ўвазе дапамогу РФ у яе вайне супраць Украіны.
– Таму мы заклікаем усіх не абыходзіць санкцыі (...) і мы таксама заклікаем не пастаўляць зброю, – дадаў ён, удакладніўшы, што гэта датычыцца і тавараў, якія могуць быць выкарыстаныя як у цывільных, так і ў ваенных мэтах.
Олаф Шольц сустрэнецца ў Пекіне са старшынёй КНР Сі Цзіньпінам і прэм'ер-міністрам краіны Лі Цянем 16 красавіка. Агрэсіўная вайна Расеі – гэта не толькі еўрапейская праблема, падкрэсліў канцлер, а «пагроза міру і бяспецы на ўсёй планеце, таму што гэта заахвоціць вельмі многіх унесці гістарычныя карэктывы».