СМІ: Кіраўніка прыватнай тэлекампаніі ў Гомелі двойчы асудзілі за «экстрэмізм»
3- 15.04.2024, 19:22
- 6,162
![СМІ: Кіраўніка прыватнай тэлекампаніі ў Гомелі двойчы асудзілі за «экстрэмізм»](https://i.c97.org/ai/591622/aux-head-1713198132-20240326_foto2_360.jpg)
Ягоны намеснік прапаў без вестак.
Вядомага гомельскага бізнэсоўца, заснавальніка і дырэктара прыватнай рэкламнай тэлекампаніі «ФілТВ» Віталя Філінскага ўжо двойчы асудзілі за «распаўсюджванне экстрэмісцкіх матэрыялаў». Паводле інфармацыі «Флагштока», першы суд, які адбыўся ў канцы сакавіка, скончыўся для бізнэсоўца 15 днямі арышту, а затым яго асудзілі паўторна, прызначыўшы чарговыя 15 дзён. Тым часам ягоны намеснік прапаў без вестак.
Паведамляецца, што Філінскі працягвае заставацца за кратамі ў ізалятары часовага ўтрымання. Відавочна, падставай для пераследу маглі паслужыць якія-небудзь публікацыі або рэпосты ў сацсетках - пасля арышту старонкі Філінскага ў «Фэйсбуку» і «Вконтакте» былі выдаленыя.
![](https://i.c97.org/ai/591622/aux-1713198128-1.jpeg)
Паводле таго ж абвінавачання нядаўна судзілі іншага буйнога гомельскага бізнэсоўца - Навума Каца. Абодва яны з'яўляюцца чальцамі грамадскага аб'яднання садзейнічання развіццю прыватнага прадпрымальніцтва «Адзінства».
Што да «ФілТБ», то гэта адзінае ў Гомельскай вобласці рэкламнае агенцтва поўнага цыклу, якое займаецца распрацоўкай рэкламнай ідэі, яе ўвасабленнем і размяшчэннем атрыманага рэкламнага прадукту на ТБ-каналах.
Цяпер кампанія апынулася наогул без кіраўніцтва - неўзабаве пасля арышту Філінскага знік без вестак ягоны намеснік Андрэй Віннікаў. Уначы 1 красавіка мужчына выйшаў з дому ў невядомым кірунку і не вярнуўся. Ужо два тыдні яго шукаюць міліцыя і валанцёры.