Жазэп Барэль: ЕЗ патрэбна змена парадыгмы еўрапейскай абароны
5- 15.04.2024, 15:14
- 2,306
![Жазэп Барэль: ЕЗ патрэбна змена парадыгмы еўрапейскай абароны](https://i.c97.org/ai/385800/aux-head-1594737084-20200714_borel_dpa_360.jpg)
ФОТА: DPA
Каб бараніць Еўропу самастойна.
Высокі прадстаўнік Еўразвязу ў пытаннях замежнай палітыкі і палітыкі бяспекі Жазэп Барэль мяркуе, што ЕЗ патрэбная змена парадыгмы еўрапейскай абароны.
Як піша «Еўрапейская праўда», пра гэта ён напісаў у сваім блогу да выхаду сваёй кнігі «Еўропа паміж дзвюма войнамі».
Паводле ягоных слоў, ЕЗ занадта доўга дэлегаваў сваю бяспеку ЗША, а ў апошнія 30 гадоў, пасля падзення Бэрлінскага муру, Еўропа дазволіла сабе "ціха раззброіцца".
Ён адзначыў, што ЕЗ быў пабудаваны вакол унутранага рынку і эканомікі, але, на яго думку, Еўразвязу нельга працягваць ісці гэтым шляхам.
"Мы павінны ўзяць на сябе стратэгічную адказнасць і стаць здольнымі абараняць Еўропу самастойна, развіваючы моцную еўрапейскую апору ўнутры NАТО", - падкрэсліў Барэль.
Топ-дыпламат дадаў, што ЕЗ павінен зрабіць гэты скачок наперад за вельмі кароткі час.
“Не таму, што мы маем намер ваяваць. Наадварот: мы хочам прадухіліць вайну, маючы сродкі для надзейнага стрымлівання кожнага агрэсара. Гэта не азначае стварэнне еўрапейскага войска. Абарона ёсць і застанецца ў бліжэйшай будучыні выключнай кампетэнцыяй нашых краін-чальцоў”, - адзначыў ён.
Барэль растлумачыў, што размова ідзе перш за ўсё аб павелічэнні выдаткаў на нацыянальным узроўні, дзе паказчык выдаткаў на абарону павінен вырасці да больш як 2 адсоткаў ад ВУП.
“Але, што яшчэ больш важна, гаворка ідзе пра супольныя выдаткі, каб запоўніць прабелы, пазбегнуць дублявання і падвысіць аператыўную сумяшчальнасць. Цяпер толькі 18% закупак абсталявання нашымі войскамі праводзіцца супольна», - указаў топ-дыпламат ЕЗ.
Барэль назваў адным з галоўных урокаў вайны РФ супраць Украіны тое, што тэхналагічная перавага з'яўляецца ключавым чыннікам, асабліва ў барацьбе з супраціўнікам, для якога жыццё каштуе танна, таму, мяркуе ён, ЕЗ неабходна мець уласную абаронную прамысловасць, якая б адпавядала яго патрэбам.
“Найбольш перспектыўныя шляхі дасягнення гэтай мэты: па-першае, змена крэдытнай палітыкі Еўрапейскага інвестыцыйнага банка, каб ён мог інвеставаць у абаронны сектар, і, па-другое, выпуск супольных пазыковых абавязанняў, як мы гэта паспяхова зрабілі, каб супрацьстаяць пандэміі COVID-19 . Аднак гэтыя дыскусіі паміж дзяржавамі-сябрамі знаходзяцца на пачатковай стадыі, і вельмі важна, каб усе да іх далучыліся”, - заклікаў чыноўнік.