Літва патлумачыла, чаму закрыла два пункты пропуску на мяжы з Беларуссю
33- 22.02.2024, 17:28
- 36,636
![Літва патлумачыла, чаму закрыла два пункты пропуску на мяжы з Беларуссю](https://i.c97.org/ai/417970/aux-head-1617973823-20210409_granicz_litva_360.jpg)
З заявай выступіла міністарка ўнутраных спраў.
Міністарка ўнутраных спраў Літвы Агне Білатайтэ заявіла, што закрыццё яшчэ двух пунктаў пропуску на мяжы з Беларуссю абумоўленае некалькімі чыннікамі, у тым ліку — нястачай рэсурсаў для якаснага кантролю і актывізацыяй дзейнасці беларускіх спецслужбаў супраць Літвы.
“У суседніх дзяржавах дзейнічае па адным пункце пропуску, у Літве - чатыры. У выніку на 50 адсоткаў павялічылася плынь грузаў, транспарту і людзей праз пункты на літоўска-беларускай мяжы. Патрэбны вялікія рэсурсы для кантролю плыні, прадухілення кантрабанды, забеспячэння міжнародных санкцый і зніжэння рызык бяспекі руху. Гэтая пастанова таксама была абумоўленая рызыкамі, звязанымі з узмацненнем дзейнасці беларускіх спецслужбаў супраць Літвы і нашых грамадзян”, - заявіла Агне Білатайтэ.
Паводле ейных слоў, урад Літвы ўхваліў пастанову скараціць на 50 адсоткаў колькасць дазволаў, якія выдаюць беларускім і літоўскім перавозчыкам на ажыццяўленне рэгулярных міжнародных пасажырскіх аўтобусных перавозак паміж краінамі.
У паведамленні ўрада Літвы адзначаецца, што ў 2023 годзе на мяжы з Беларуссю ў аўтамабільных пунктах пропуску прайшлі кантроль амаль 3,9 мільёна чалавек, што на 25,5% больш за ўзровень 2022 года. 66 адсоткаў склалі менавіта грамадзяне Беларусі.
Згодна з апублікаванай статыстыкай, колькасць грамадзян Літвы, якія наведвалі Беларусь у 2023 годзе, скарацілася на 13,4% да 684 тысяч чалавек. Аднак літоўскі ўрад лічыць і гэтыя лічбы «надзвычай высокімію.
Урад Літвы таксама нагадаў сваім грамадзянам аб рэкамендацыі «не наведваць Расею і Беларусь у сувязі з нядаўняй актывізацыяй варожых і правакацыйных дзеянняў беларускіх і расейскіх спецслужбаў супраць грамадзян Літвы, якія ўжо знаходзяцца або часова прыбылі ў гэтыя краіны».
Урад Літвы 21 лютага падтрымаў ініцыятыву Нацыянальнага цэнтра кіравання крызіснымі сітуацыямі аб закрыцці з першага сакавіка яшчэ двух пунктаў пропуску на мяжы з Беларуссю — "Райгард" і "Лаварышкі".
Адкрытымі застануцца пункты пропуску "Меднікі" і "Салечнікі", але на іх з вясны таксама абмяжуюць рух пешаходаў і веласіпедыстаў.