Уладзімір Фясенка: Лукашэнка адрэзаў сабе апошнія шляхі да адступлення

Страх і паранойя ў дыктатара ўзмацняюцца.

Лукашэнка ўпершыню публічна пацвердзіў пашкоджанне расейскага самалёта ДРЛА А-50У ў Мачулішчах, назваўшы яго «тэрактам». Ён абвінаваціў у гэтым «украінскага дыверсанта», СБУ і ЦРУ. Чаму беларускага дыктатара «прарвала» больш чым праз тыдзень маўчання пра інцыдэнт у Мачулішчах?

Пра гэта сайт Charter97.org пагаварыў з вядомым украінскім палітолагам, кіраўніком Цэнтра прыкладных палітычных даследаванняў «Пента» Уладзімірам Фясенкам.

- Гэта можа быць звязанае і з нядаўняй паездкай Лукашэнкі ў Пекін. Магчыма, што ў Кітаі ён адчуў жорсткія антыамерыканскія настроі, якія паўплывалі і на яго. Ён таксама пастанавіў прадэманстраваць жорсткасць, дзейнічаць у такой стылістыцы.

Магчыма, ёсць і нейкія ўнутраныя прычыны, якія ўплываюць на Лукашэнку, але пра гэта лепш меркаваць беларускім экспэртам. Магчыма, нейкія праблемы ўнутры краіны, дрэнная праца і памежнікаў, і спецслужбаў.

Мне падаецца, што тое, што адбылося, Лукашэнка ўспрыняў як уласнае прыніжэнне. Ён шмат у чым пераймае Пуціна. Для яго ўсё павінна быць стабільным і пад кантролем, а тут адбываецца такі інцыдэнт, які паказвае, што поўнага кантролю няма.

У Лукашэнкі ўсё мацней праяўляецца паранойя. Яна ўвогуле ўласцівая дыктатарам. Мы бачым узмацненне паранойі і ў Пуціна, а цяпер гэта адбываецца з беларускім дыктатарам.

Ён баіцца пераносу ваенных дзеянняў на тэрыторыю Беларусі. Лукашэнка бачыць у гэтым пагрозу для сваёй уласнай улады. Тое, што аб датычнасці да гэтага інцыдэнту заявілі беларускія партызаны, таксама ўзмацняе яго паранойю.

Лукашэнка разумее, што беларуская апазіцыя цяпер на баку Украіны. Многія беларусы ваююць ва Украіне і яны могуць направіць сваю зброю супраць яго пасля заканчэння вайны або ў тым выпадку, калі Лукашэнка наўпрост падтрымае Пуціна - увяжацца ў вайну супраць Украіны.

Падкрэслю, што тое, што адбылося ў «Мачулішчах», узмацніла паранойю і страхі Лукашэнкі. Адсюль і вось гэты эмацыйны зрыў. Ён наогул за словам у кішэню не лезе, любіць ствараць інфармацыйныя нагоды сваімі эмацыйнымі выразамі, але апускацца да такога хамства некарэктна і гэта своеасаблівая «чырвоная лінія».

Уласна, «чырвоная лінія» была пройдзеная Лукашэнкам 24 лютага мінулага года. У той момант, калі РФ атакавала Украіну з тэрыторыі Беларусі, але што тычыцца асабістых стасункаў з прэзідэнтам Украіны Уладзімірам Зяленскім, то пасля такіх абраз, думаю, што пра іх не можа быць і гаворкі.

Гэта яшчэ адна прыкмета ўзмацнення канфрантацыі. Лукашэнка ўсё мацней загразае ў балоце вайны і канфлікце з Украінай. Лукашэнка кідаецца, не кантралюе эмоцыі. З пункту гледжання класічнай палітыкі, калі б ён рацыянальна ацэньваў свае перспектывы, то было б лепей для яго пазбягаць такога хамства ў дачыненнях з украінскім лідарам, а ён апусціўся да гэтага. Значыць, адрэзаў сабе апошнія шляхі да адступлення.

- Вы згадалі, што ваенныя дзеянні могуць перанесціся на тэрыторыю Беларусі. Як вы гэта бачыце?

- Я кажу не пра перанос класічных ваенных дзеянняў на сушы. Мы бачым, што Украіна неафіцыйна, не фармальна ўжывае тактыку, калі ў адказ на абстрэлы і ўдары па сваёй тэрыторыі ўкраінцы робяць тое самае.

Удары наносяцца па тэрыторыі тых краін, з якіх атакуюць Украіну. У час вайны гэта непазбежна. Рана ці позна гэта павінна адбыцца. Украіна цяпер узмацняе свой флот дронаў і, на маю думку, атакі ў адказ па тэрыторыі Расеі будуць адбывацца.

Калі будуць атакі на Украіну з тэрыторыі Беларусі, то будуць і атакі на вайсковыя аб'екты на беларускай тэрыторыі. Паўтаруся - гэта непазбежна.

Што да іншых формаў вайсковых дзеянняў, то гэта залежыць ад Лукашэнкі. Калі ён увяжацца ў ваенную авантуру Пуціна, калі Беларусь афіцыйна пойдзе на вайну супраць Украіны, то ў гэтай вайне на баку Кіева будуць удзельнічаць прадстаўнікі беларускай апазіцыі. Не будзе ніякіх перашкодаў для іх распачаць вайну супраць Лукашэнкі на тэрыторыі Беларусі.

Лукашэнка 24 лютага зрабіў фатальную памылку. Дробныя памылкі працягвае рабіць і далей, але калі ўвяжацца ў вайну супраць Украіны, то - усё. Мяркую, што тады яго чакае вельмі сумны фінал. Ён раней за Пуціна можа стаць ахвярай гэтай вайны.

Калі вам спадабаўся артыкул, вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL 97 1160 2202 0000 0002 1671 1123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]