Дзмітрый Губерніеў раптам выдаў праўду, выклікаўшы пярэпалах у РФ

На каментатара накінуліся з крытыкай.

Вядомы расейскі каментатар Дзмітрый Губерніеў, які ў сакавіку 2022 года вёў Z-канцэрт у Лужніках, назваў Расею неспартовай краінай праз міжнародную ізаляцыю. Гэтыя словы выклікалі пярэпалах сярод расейскіх прапагандыстаў.

Старшыня камітэта Дзярждумы РФ у фізкультуры і спорце Дзмітрый Свішчаў не згодны з каментатарам. Пра гэта паведамляе sportsdaily.ru.

«Але я не думаю, што трэба цяпер так катэгарычна заяўляць, што Расея – неспартовая краіна. Расея – спартовая краіна, і тое, што мы недзе адсталі, мы хутка навярстаем. Я ўсё ж скептычна так не ставіўся б да нашых спартоўцаў», – заявіў Свішчаў.

Кіраўніца Федэрацыі лыжных гонак Расеі Алена Вяльбе ў адказ на словы Губерніева заявіла, што расейцы сталі менш ужываць алкаголь.

«Не заўважаю, што Расея – неспартовая краіна. Усё з дакладнасцю да наадварот. Для таго каб зразумець, што наша краіна спартовая, можна паглядзець, колькі людзей у нас займаюцца спортам і фізічнай культурай. Людзі сталі ўжываць значна менш алкаголю», – цытуе Вяльбе sport24.ru.