Навукоўцы: Падарожжа ў часе магчымае ўнутры Сусвету, які круціцца

Гэта дапускае тэорыя знакамітага матэматыка.

Падарожжы ў часе да гэтага часу застаюцца немагчымымі, і перамяшчэнні ў мінулае ажыццяўляюць толькі героі фантастычных кніг і фільмаў. Але высвятляецца, скіравацца ў мінулае можна, калі прымусіць наш Сусвет круціцца, піша Universe Today (пераклад – «Фокус»).

Знакаміты матэматык Курт Гедэль быў сябрам Альберта Эйнштэйна, і яго вельмі моцна зацікавіла агульная тэорыя адноснасці, якую прапанаваў навуковец. Гэтая тэорыя была і застаецца нашым сучасным апісаннем гравітацыі. Агульная тэорыя рэлятыўнасці Эйнштэйна звязвае прысутнасць матэрыі і энэргіі са скрыўленнем прасторы і часу, а потым звязвае гэтае скрыўленне з паводзінамі матэрыі і энэргіі.

Курту Гедэлю стала цікава, ці можа тэорыя рэлятыўнасці дазволіць падарожнічаць у мінулае. Тэорыя Эйнштэйна прэтэндавала на тое, каб стаць канчатковай асновай для прыроды прасторы і часу, і, наколькі цяпер вядома, падарожжы ў мінулае забароненыя. Таму Гедэль меркаваў, што агульная тэорыя рэлятыўнасці павінна аўтаматычна адхіляць гэта. Але Гедэль выявіў, што насамрэч агульная тэорыя адноснасці выдатна падыходзіць для падарожжаў у часе ў мінулае. Хітрасць заключаецца ў тым, каб прымусіць Сусвет круціцца.

Навуковец стварыў простую мадэль Сусвету, якая круціцца і змяшчае толькі адзін кампанент, каб даказаць свой пункт гледжання. Гэты кампанент уяўляе з сябе адмоўную касмалагічную канстанту, якая супраціўляецца цэнтрабежнай сіле кручэння, што ўтрымлівае Сусвет у статычным становішчы.

Гедэль прыйшоў да высновы, што, калі ісці па пэўным шляху ў гэтым закручаным Сусвеце, можна апынуцца ў сваім уласным мінулым. Але для гэтага трэба падарожнічаць вельмі далёка, на мільярды светлавых гадоў, але патрапіць у мінулае магчыма.

Падчас гэтай вандроўкі круціцца будзе не толькі матэрыя, але і прастора і час. Гэта значыць кручэнне Сусвету настолькі моцна зменіць патэнцыйны шлях наперад, што гэты шлях прывядзе вас зваротна да таго, з чаго вы пачалі.

Навуковец меркаваў, што, падарожнічаючы з хуткасцю не большай за хуткасць святла, можна вярнуцца да пункта пачатку руху, але гэты пункт будзе ў мінулым вандроўніка ў часе.

Як вядома, тэарэтычныя вандраванні ў мінулае ствараюць часавыя парадоксы, парушаючы наша разуменне прычынна-выніковых сувязяў. Але ўсе назіранні сучасных навукоўцаў паказваюць на тое, што Сусвет не круціцца, а значыць, апісанага вышэй варыянту развіцця падзей адбыцца не можа.

Дагэтуль застаецца загадкай, чаму агульная тэорыя рэлятыўнасці дапускае такую, здавалася б, немагчымую з'яву, як падарожжа ў часе. Гедэль выкарыстаў прыклад закручанага Сусвету, каб даказаць, што агульная тэорыя адноснасці не поўная, і ён усё ж можа мець рацыю ў сваіх высновах.