Хто можа мець дачыненне да забойства ветэрынара на рыбалцы ў Брагінскім раёне?

МУС і Дзяржаўны памежны камітэт Беларусі маўчаць.

Праз два дні пасля гібелі ў Брагінскім раёне гомельскага ветэрынара Сяргея Чамбровіча ад афіцыйных крыніц не з'явілася ніякай інфармацыі. МУС і Дзяржаўны памежны камітэт Беларусі маўчаць.

«Флагшток» сабраў усю інфармацыю аб гібелі гомельскага ветэрынара і разгледзеў тры версіі трагічнага здарэння.

З розных крыніц «Флагштоку» стала вядома, што 9 траўня ў раёне вёскі Ніжнія Жары Брагінскага раёна быў забіты рыбак.

Вядома, што трагедыя адбылася 9 траўня прыкладна 10-11 гадзін на «Камні» (урочышча ў раёне ўпадзення ў Днепр старыцы каля в. Верхнія Жары). Там падчас рыбалкі быў застрэлены Сяргей Чамбровіч, яго кампаньён паспеў уцячы і дабрацца да памежнай службы.

Неабходна адзначыць, што паводле пастановы ДПСУ (дзяржаўная пагранічная служба Украіны) з 20 красавіка ў Чарнігаўскай вобласці забаронена знаходжанне грамадзян Украіны і замежных грамадзян у памежнай тэрыторыі.

Сінхронныя абмежаванні былі прынятыя і з беларускага боку: Брагінскі і Лоеўскі райвыканкамы ўвялі забарону на выкарыстанне лодак на Дняпры і яго старыцах. Яшчэ раней (з пачатку сакавіка) пад маркай засухі было забаронена наведванне лясоў у гэтых раёнах.

Версія 1: страляніна з украінскай тэрыторыі

Ад меркаванага месца здарэння да бліжэйшага ўкраінскага берага блізу 450 метраў (гэта бераг ізаляванага поймавага вострава), да бліжэйшага ўкраінскага сяла Загатка - 2,5 кіламетра. Прыцэльная стральба з такіх адлегласцяў без спецыяльнай оптыкі, зброі і падрыхтоўкі выглядае непраўдападобнай.

Стральбу па рыбаках з лодкі з меншай адлегласці ўкраінскімі спецслужбамі альбо «мсціўцамі» таксама цяжка ўявіць. Ва ўмовах патрулявання ракі і наяўнасці відэаназірання на воднай мяжы такая грубая правакацыя дала б рэжыму Лукашэнкі казыры для інфармацыйнай вайны і падставы для мілітарызацыі памежжа проста ў дзень здарэння - 9 траўня. Але прапаганда прамаўчала.

Версія 2: стральба беларускіх «сілавікоў»

Ахова беларуска-ўкраінскай мяжы была ўзмоцненая яшчэ да вайны. Цяпер служба ў памежнай зоне ўзмоцнена іншымі вайсковымі падраздзяленнямі МА РБ.

Ці маглі «сілавікі», прыстаўленыя да аховы мяжы, застрэліць сваіх суграмадзян? Цяжка меркаваць, у якім маральна-псіхалагічным стане знаходзяцца вайскоўцы, якія патрулююць мяжу. Але каб адбылася такая трагедыя, трэба рыбакоў зблытаць з дыверсантамі і адкрыць агонь без папярэджання.

У такую версію цяжка паверыць, аднак маўчанне МУС намякае, што пра тое, што адбылося, даваць справаздачу вельмі не хочацца.

Версія 3. Бытавая

Спрэчка, якая перарасла ў бойку — частая прычына ненаўмысных забойстваў у Беларусі. Сітуацыя ў дзікай мясцовасці, дзе могуць быць паляўнічыя з агнястрэльнай зброяй, робіць такую версію магчымай. Але і тады складана растлумачыць маўчанне сілавікоў.