Жыхары Барысава чакаюць прыёму да лекара ў гіганцкіх чэргах па 6-7 гадзін

Паліклініка працуюць у экстрэмальным рэжыме.

Нягледзячы на «значны» спад захворвання каранавірусам паводле афіцыйных звестак па краіне - з 8 тысяч 315 на 6 лютага да 5 тысяч 869 пацыентаў на 7 лютага, барысаўскія паліклінікі працягваюць працу ў экстрэмальным рэжыме. Здымкамі падзяліліся чытачы EX-PRESS.BY.

Захварэлыя, якія занялі чаргу ў «чырвонай зоне» з самай раніцы, яшчэ да адкрыцця 4-й паліклінікі Барысава, змаглі патрапіць на прыём да лекара толькі ў абед. У выніку час чакання ў сярэднім складае 6-7 гадзін.

Шматгадзіннае чаканне суправаджаецца нястачай месцаў для сядзення, задухай і, натуральна, вымушаным галаданнем.

«Што не так з беларускай медыцынай, якая ператварае працэс лячэння людзей у невыносныя фізічныя пакуты, варта было б разабрацца тым, хто за яе адказвае. Але пакуль яны лечацца не так, як простыя грамадзяне, гэтага, відаць, не адбудзецца», - мяркуе барысавец, які даслаў здымкі.

Нагадаем, у Барысаўскім раёне зараз назіраецца рост колькасці хворых на вострыя рэспіраторныя вірусныя інфекцыі і каранавірусы. Пацыентаў з ковідам лечаць у Барысаўскай інфекцыйнай лякарні, аддзяленні кардыялогіі бальніцы №2. Яшчэ 40 ложкаў выдзеленыя ў аддзяленні пульманалогіі на выпадак росту шпіталізацыі.