З Мікалая Статкевіча прадаўжаюць здзекавацца ў калоніі

Палітвязня перавялі ў ШІЗА.

Пра новыя здзекі з лідара беларускай апазіцыі і палітвязня Мікалая Статкевіча стала вядома ад жонкі палітвязня. У лісце Мікалай напісаў, што яго выклікалі на камісію за чарговыя «парушэнні». Марына Адамовіч мяркуе, што Статкевіч зноў апынуўся ў штрафным ізалятары.

Да гэтага Мікалай знаходзіўся ў ШІЗА ў верасні, у жніўні яго перавялі ў адзіночную камеру на паўгода.

Адміністрацыя калоніі паставіла Статкевіча на ўлік як «схільнага да экстрэмізму», а ў ліпені пазбавіла яго перадач і таксама адправіла ў ШІЗА на 8 дзён.

Сам Мікалай так піша аб сваім стане і настроі:

«У мяне ўсё добра, адчуваю сябе добра. Тут усё, як звычайна - чытаю, займаюся фізкультурай...

Калі ласка, не хвалюйся за мяне. Я не мерзну, ежы мне дастаткова. Да ШІЗА я, як сапраўдны беларус таксама прывык. Да таго ж, там камера ў разы большая, чым адзіночка. Ёсць дзе пагуляць. Бо паўгадзіны шпацыру мне мала, а гулянне па камеры не зусім тое, хаця я там шмат хаджу».

Таксама Статкевіч заклікае захоўваць бадзёры настрой:

«Разумею, што быць пазітыўным у такіх складаных умовах цяжка. Але ўсё адно – трэба цешыцца! ...Імкніся быць на пазітыве, думай аб добрым, шукай радасных заняткаў».