Выяўлены новы штам каранавіруса, які назвалі «Дэльтакрон»

Што пра яго вядома?

На Кіпры навукоўцы выявілі новы штам каранавіруса, які з'яўляецца гібрыдам штамаў «Дэльта» і «Амікрон». Пра гэта 8 студзеня паведаміла выданне Cyprus Mail.

Доктар Леонціас Кострыкіс, які ўзначальвае групу навукоўцаў лабараторыі біятэхналогіі і малекулярнай вірусалогіі Кіпрскага універсітэта, расказаў, што «Дэльтакрон» ужо выявілі ў 25 пацыентаў на Кіпры, 11 з іх знаходзяцца ў бальніцы, а 14 праходзяць лячэнне амбулаторна.

«Дэльтакрон» мае генетычнае паходжанне варыянту «Дэльта» разам з некаторымі мутацыямі «Амікрона», паведаміў Кострыкіс.

З ягоных слоў, «Дэльтакрон» не быў ідэнтыфікаваны больш нідзе ў свеце, таму гэтае адкрыццё можа мець глабальную цікавасць, піша Cyprus Mail.

Навуковец распавёў, што 25 узораў «Дэльтакрон» былі перададзены ў базу звестак GISAID (глабальная навуковая ініцыятыва, якая забяспечвае адкрыты доступ да геномных звестак вірусаў грыпу і SARS-CoV-2), што зробіць іх даступнымі для сусветнай навуковай супольнасці, адзначае выданне.

Пры гэтым Кострыкіс падкрэсліў, што яшчэ рана прадказваць, ці зможа «Дэльтакрон» перасягнуць «Дэльту» і «Амікрон».