«Пасля 24-й ваш каранавірус ператворыцца ў гарбуз»: Як беларусаў выпісваюць з станоўчым COVID-19

Шакавальная гісторыя з Гомеля.

Нядаўна «Моцныя навіны» расказвалі гісторыю гамяльчанаў, якія перахварэлі на каранавірус у Менску. Праз 12 дзён яны паведамілі нам: выпісаныя, хоць у аднаго з сужэнцаў апошні тэст быў станоўчым. Як так атрымалася?

Пара расказвае: пакуль былі на самаізаляцыі, іх не абміналі ўвагай правяральнікі (гэта АМАП або міліцыя) – практычна кожны дзень тэлефанавалі пераканацца, ці знаходзяцца хворыя дома. А вось брыгада, якая павінна была браць тэсты, ні разу не прыйшла своечасова. Фінальны візіт і бальнічны «пратэрмінавалі» на 4 дні.

– 18-га нам зрабілі паўторныя тэсты, праз 7 дзён муж атрымаў свой адмоўны, а мой вынік прыйшоў на 8-ы дзень – станоўчы. Незразумела, што рабіць: мужу ісці закрываць бальнічны ці рабіць паўторны тэст – мы шмат дзе чулі, што пры COVID-19 чакаюць двух адмоўных, каб пераканацца, што чалавек не заразны, – удакладняе Ганна. – Нам сказалі: сядзіце дома – да вас прыйдуць, чакайце. У нас бальнічны быў да 22 траўня, а ні 25, ні 27 нават да нас так і не дайшлі. Наша каранавірусная брыгада з'явілася 28-га, нам паведамілі, што выпісваюць.

Медыкі патлумачылі: паводле новых нормаў, на 21-ы дзень пацыенты мяркуюцца здаровым. Параілі ісці ў паліклініку – закрываць бальнічныя.

– Мы сядзелі ў ступары: у мяне апошні тэст быў станоўчы, гэта значыць я, магчыма, яшчэ хварэю. Сказалі, што ў паліклініцы мне могуць зрабіць экспрэс-тэст. Зноў адседзелі 3 гадзіны ў чарзе, лекарка сказала, што такія тэсты робяцца нашча, таму трэба прыходзіць заўтра, а заўтра ў мяне ўжо 21 дзень з пачатку хваробы, значыць, я буду лічыцца здаровай і правяраць мяне ўжо ніхто не будзе.

Гаворка ідзе пра загад, выдадзены Міністэрствам аховы здароўя 21 траўня. Ён сапраўды змяніў правілы тэставання пацыентаў з COVID-19. Раней пры лёгкай форме яго праводзілі кожныя 5 дзён, пакуль вынік не будзе адмоўным. Паводле ж новых нормаў такім пацыентам на 14 дзень ці пасля знікнення сімптомаў праводзіцца паўторнае тэставанне (экспрэс-тэст), калі вынік станоўчы, пацыенту закрываюць бальнічны на 21-ы дзень з моманту кантакту.

Ганна кажа, што расчараваная ў сістэме. Дзяўчына не ўпэўненая, што ўжо не з'яўляецца пераносчыкам вірусу і бяспечная для навакольных.

– У чарзе ў паліклініцы мы чулі такія ж гісторыі, калі людзей выпісваюць на 21-ы дзень. А калі хто-небудзь з іх усё яшчэ заразны, бо хвароба ва ўсіх працякае індывідуальна? Можа быць, і арганізм вірус ва ўсіх вылучае таксама індывідуальна. Цікава, на якія даследаванні яны абапіраліся? «Математичэски выверэны срок балезни», іншае тлумачэнне мы знайсці не можам.

Фактычна, не пераканаўшыся, што я бяспечная для іншых, мне дазволілі выходзіць куды заўгодна. Гэта значыць, да гэтага мне кожны дзень званілі ў дамафон і правяралі, каб я, не дай Бог, не выйшла з хаты, а на 21-ы дзень ужо ўсё, як у казцы пра Папялушку: пасля 24-й ваш каранавірус ператворыцца ў гарбуз і скажа вам «пакуль»? Неяк непераканальна. Страшна, што так людзі і далей могуць распаўсюджваць хваробу, а потым мы дзівімся росту статыстыкі.