«Раней да сэканд-хэнда ставілася адмоўна, а цяпер люблю»

Бармэн з Баранавічаў пра свае даходы і выдаткі.

Жыхарка Баранавічаў, якая працуе бармэнам у адной з кавярняў, распавяла Intex-press, колькі зарабляе, як часта і дзе абнаўляе гардэроб, на што адкладае грошы і чаму шкадуе, што сёлета не пасадзіла агарод:

- Пасля школы я скончыла курсы сакратаркі-справавода, аднак уладкавацца на працу не атрымалася: не было досведу і мяне нікуды не хацелі браць.

У 2010 годзе я паступіла ў БарДУ на спецыяльнасць "Дашкольная адукацыя. Практычная псіхалогія». Вучылася завочна, паралельна падзарабляючы. На трэцім курсе зразумела, што абраная спецыяльнасць не прынясе мне вялікага заробку. Таму, атрымаўшы дыплом, па спецыяльнасці працаваць не пайшла.

Пра работу бармэна я не марыла, але ўбачыла ў газеце абвестку і пайшла на сумоўе. Пасля трохдзённай стажыроўкі мяне ўзялі ў штат.

Заробак залежыць ад сезону

Бармэнам я працую ўжо 4 гады. Графік - два праз два. Мне ўсё падабаецца, і адчуваю сябе тут як рыба ў вадзе. Хоць, як і ў любой іншай прафесіі, ёсць свае плюсы і мінусы.

Да мінусаў можна аднесці сезоннасць працы: улетку цяжка - шмат людзей. Часам адчуваю, што ўсё надакучыла: каса, цэны, людзі. Кожны дзень падобны на папярэдні, і часам становіцца сумна. Таксама мяне засмучае, што няма магчымасці кар'ернага росту.

Дынаміка маёй працы - гэта несумненны плюс. Таксама да плюсаў можна аднесці нядрэнныя стасункі з кіраўніцтвам.

Заробак залежыць ад сезону. Улетку атрымліваю ў сярэднім 470-500 рублёў. Узімку прыкладна 450. Вядома, хацелася б зарабляць больш. Але, калі глядзець, колькі атрымліваюць людзі па горадзе, мой заробак не такі і дрэнны.

Не трэба выдаткоўваць грошы на арэнднае жыллё

Уласнай сям'ёй я пакуль не абзавялася. Жыву з бацькамі і братам. У фінансавым плане нашмат лягчэй: не трэба выдаткоўваць грошы на арэнднае жыллё. Камунальныя плацяжы дзелім на ўсіх. У месяц у мяне сыходзіць прыкладна 50 рублёў.

Штомесяц плачу за мабільны тэлефон, які набыла ў крэдыт. На гэта сыходзіць 60 рублёў. Плюс 20 - за карыстанне мабільнай сувяззю. На працу езджу на аўтобусе, а дадому мяне звычайна адвозіць мой хлопец. Таму праязны не купляю, на талоны сыходзіць блізу 10 рублёў.

«Агарод дапамагае эканоміць»

На прадукты ў месяц сыходзіць прыкладна 100 рублёў. Прадукты я купляю самыя неабходныя: хлеб, батон, мяса, крупы, малочную прадукцыю. Час ад часу магу папесціць сябе чымсьці смачным. Дарагую садавіну і чырвоную рыбу не бяру - шкада выдаткоўваць на гэта грошы.

Мне не прынцыпова, дзе купляць прадукты. Часам бяру акцыйныя тавары. Бывае, што магу абысці некалькі крам у пошуках прадуктаў меншым коштам.

Мы з сям'ёй жывём у сваім доме. Сёлета наважылі, што агарод садзіць не будзем. Цяпер я пра гэта шкадую. Раней свежая зеляніна і гародніна ўспрымаліся як належнае. Цяпер іх даводзіцца купляць. Налета абавязкова пасаджу агарод. Ён дапамагае эканоміць.

Сродкі для валасоў - прафесійныя

Раней я купляла звычайныя шампуні і сродкі па догляду за валасамі. Здавалася, валасы набывалі бляск, але ў хуткім часе пачыналі выпадаць. Аднойчы ў якасці эксперыменту купіла сродкі ў прафесійнай краме. Мне яны спадабаліся больш. Так, кошты на прафесійныя сродкі вышэйшыя, але часта ёсць добрыя зніжкі.

Мыла, пральны парашок, зубную пасту, сродкі для доглядам за целам і мыйныя купляю ў звычайных крамах па меры неабходнасці. На ўсе гэтыя пакупкі сыходзіць прыкладна 70 рублёў у месяц.

Выбіраючы дэкаратыўную касметыку, не аддаю перавагу дарогай. Думаю, што яна не апраўдае сваю цану. Да акцыяў стаўлюся скептычна - баюся, што тавар нізкай якасці. Таму купляю касметыку па сярэднім кошце.

Купля рэчаў - спосаб расслабіцца

За сваёй знешнасцю даглядаю самастойна, не звяртаючыся да паслуг адмыслоўцаў. Валасы не афарбоўваю, а стрыжку мне робіць мама. Гэта нядрэнная эканомія. Раней я пакрывала пазногці гелем, але з часам адмовілася - вынік не заўсёды адпавядаў маім чаканням. Зараз я раблю манікюр сама.

Рэчы я купляю часта - гэта мой спосаб расслабіцца. Хаджу на рынак, па крамах, часам езджу ў Менск. Раней да сэканд-хэнд ставілася адмоўна, а цяпер люблю. Люблю іх за даступнасць і эксклюзіўнасць. Гляджу, каб рэч была якаснай, без бобачак і з новай этыкеткай. У месяц выдаткоўваю на абноўкі прыкладна 45 рублёў.

«Хачу паехаць на мора»

У мяне ёсць магчымасць адкладаць грошы. У ідэале ў скарбонку адпраўляецца 100 рублёў у месяц. Калі з грашыма складана, магу адкласці 20 рублёў. Назапашаную суму планую патраціць на падарожжа. Вельмі хачу паехаць у верасні на мора. Мне нават усё роўна куды: можна ва Украіну, а можа, пашанцуе і атрымаецца купіць падпалены тур у Турцыю ці Егіпет.