У лоб фоташоп

Добра яшчэ, што праўладныя ведзьмакі асвоілі толькі азы фоташопу, не занураючыся ў яго нетры.

Наш свет недасканалы, і чалавек стагоддзямі пакутаваў ад немагчымасці выправіць яго хібы. Невядома, колькі б яшчэ працягвалася гэтая мука, калі б у канцы XX стагоддзя сціплы студэнт Мічыганскага ўніверсітэта Томас Нол не напісаў праграму Display для рэдагавання выяў, якую праз год у яго выкупіла кампанія Adobe Systems і пераназвала ў Photoshop. З таго часу ўсе недасканаласці свету выпраўляюцца адным рухам маніпулятара. Ну, у крайнім выпадку, двума, піша «БелГазета».

Фоташоп - вялікая рэч! З яго дапамогай непрыгожыя жанчыны становяцца прыгожымі, тоўстыя - худымі, глухі гатэлі ператвараюцца ў пяцізоркавыя гатэлі, а швайцарскі гадзіннік патрыярха Кірыла знікае гэтак жа цудоўна, як і з'яўляецца.

Цуды фоташопа на мінулым тыдні прадэманстравала і газета «Единство» Барысаўскага райвыканкама, якая надумала ўзяць інтэрв'ю ў трэнера кросфіту ў інвалідным вазку Віктара Захар’ева. І ўсё б нічога, ды толькі на інтэрв'ю ён прыйшоў у світшоце з выявай «Пагоні».

«Пагоня» - сімвал, унесены ў спіс гісторыка-культурнай спадчыны Беларусі, ён прысутнічае на гербах многіх беларускіх гарадоў, так што тут усё легальна і законна. Аднак на некаторых грамадзян ён чамусьці дзейнічае, як чырвоная ануча на быка. Не сталі выключэннем і супрацоўнікі «Единства» - на фатаграфіі, якая суправаджае інтэрв'ю з Віктарам, гістарычны герб Беларусі быў старанна зарэтушаваны.

Галоўная рэдактарка барысаўскай раёнкі Вера Пратасевіч у каментары для «Нашай Нiвы» сказала, што не ведала пра гэтую сітуацыю, а пастанову аб замазванні «Пагоні» прымала аўтарка матэрыялу Кацярына Вараб'ёва. Сама журналістка адмовілася тлумачыць прычыны свайго дзівацтва. «Не разумею, чаму гэта так хвалюе вас», - здзівілася яна. O sancta simplicitas!

Дарэчы, гэта ўжо не першы выпадак рэтушавання непажаданай сімволікі праўладнымі СМІ. Летам 2017 года тэлеканал СТВ зняў сюжэт пра краму Symbal.by Паўла Белавусава. У версіі, што транслявалася ў эфіры, замазанымі былі не толькі выявы «Пагоні», але і бел-чырвона-белыя стужачкі і нават украінскі герб-трызуб.

Добра яшчэ, што праўладныя ведзьмакі асвоілі толькі азы фоташопу, не занураючыся ў яго нетры. А то ж гэтая праграма дазваляе тварыць значна больш цікавыя фокусы. Напрыклад, мяняць твары на здымку. Уяўляеце, што было б, калі б яны асвоілі і гэтую функцыю? У нумары рэпартаж пра апазіцыйны мітынг - а ва ўсіх апазіцыянераў твар Лукашэнкі. А ў апазіцыянерак - Ярмошынай. Прыгажосць!