Навукоўцы вызначылі самую рэлаксацыйную песню ў свеце
13- 20.07.2019, 16:09
- 21,412
Гэтая песня здольная супакоіць пацыентаў так жа, як і медыцынскія прэпараты.
Навукоўцы высветлілі, што праслухоўванне «найбольш рэлаксацыйнай песні ў свеце» перад аперацыяй здольнае супакоіць пацыентаў так жа, як медыцынскія прэпараты, паведамляе BBC.
Песня, пра якую ідзе гаворка, была напісаная для таго, каб зніжаць пачуццё трывогі, крывяны ціск і сардэчны рытм.
Падчас даследавання, якое праводзілася з удзелам 157 добраахвотнікаў, яна паказала такія ж вынікі, як седатыўныя сродкі. Зрэшты, удзельнікі эксперыменту заявілі, што аддалі б перавагу іншай музыцы.
Са слоў даследнікаў з Універсітэта Пенсільваніі, у далейшым яны плануюць такім жа чынам пратэставаць і іншыя тыпы музыкі, каб зразумець, як гэта паўплывае на стан пацыентаў.
Падчас эксперыменту добраахвотнікам давалі прэпарат мідазалам або ўключалі для іх песню Weightless брытанскага эмбіент-гурта Marconi Union.
Вось, як гучыць гэтая кампазіцыя:
Нарэшце высветлілася, што пачуццё трывогі ў абодвух выпадках памяншалася да падобнага ўзроўню.
Стрэс і пачуццё трывогі перад аперацыяй можа дрэнна паўплываць на аднаўленне пацыента, бо ў арганізме выпрацоўваюцца гармоны стрэсу.
Пры гэтым, кажуць даследнікі, адным з мінусаў медыцынскіх прэпаратаў з'яўляецца тое, што яны маюць пабочныя эфекты і пацыенты павінны правярацца ў лекараў.
З музыкай усё наадварот, адзначаюць навукоўцы. Да таго ж, у адрозненне ад лекаў, яна амаль нічога не каштуюць.
«Музыка актывізуе зоны мозгу, якія адказваюць за эмоцыі, сістэму ўзнагароджанняў і шляхі задавальнення. Гэта азначае, што пацыенты застаюцца «ў сваім уласным свеце», адчуваюць сябе максімальна камфортна і прадаўжаюць кантраляваць сітуацыю», - кажа адна з аўтарак даследавання лекарка Віна Граф.