У РФ кіроўцаў пакараюць «рублём» за адмову ставіць «жучкі» на машыны

Для тых, хто адмовіцца ўсталёўваць тэлематычныя датчыкі, поліс падаражэе ўдвая.

Адмова кіроўцаў усталёўваць ва ўласных аўтамабілях тэлематычныя датчыкі, якія паведамляюць страхоўшчыкам пра хуткасць і геаграфію перамяшчэння кліента, зробіць поліс АСАГА прыкметна даражэйшым, піша сайт finanz.ru.

Так, сума, якую давядзецца выкласці аўтаўладальніку без тэлематычнага датчыка, ужо ў 2020 годзе для некаторых расейцаў можа стаць вышэйшай больш чым на 100%.

Законапраект пра так званую лібералізацыю АСАГА рыхтуецца да разгляду ў Дзярждуме ў першым чытанні 15 кастрычніка. У дакуменце, сярод іншага, ёсць пункт пра чыннікі, якія страхавальнікі могуць браць да ўвагі пры вызначэнні індывідуальнага тарыфу для кліента: "характарыстыка (навыкі) кіравання транспартнага сродку ягоным уладальнікам (рэзкасць тармажэння, паскарэння, перастраення, частата і даўжыня выкарыстання транспартнага сродку) пры ўмове іхняй фіксацыі, у тым ліку з выкарыстаннем тэлематычных прыладаў...".

Персаналізацыя тарыфаў АСАГА і будзе заключацца ў тым, што страхавальнікі самастойна абяруць для кліента тарыф, пры гэтым яны будуць мець права браць да ўвагі наяўнасць або адсутнасць страхавога датчыка ў аўто, паказваюць у Мінфіне, які з'яўляецца аўтарам законапраекта. Пры гэтым ва ўстанове нагадалі, што пастанова ўсталёўваць датчык – гэта не абавязак кіроўцы, а ягонае права.

У цяперашнім выглядзе папраўкі дазволяць страхоўшчыкам налічыць максімальны кошт АСАГА кліенту, што адмовіліся ад тэлематычнага датчыка. У законапраекце цалкам адсутнічае нарматыўнае рэгламентаванне зніжкі альбо павелічэння кошту для такіх кіроўцаў. Пры гэтым тарыфны калідор АСАГА прапануецца ўжо з 1 студзеня 2020 года пашырыць на 40%, а з кастрычніка яшчэ дадаткова на 30%.

Цяпер максімальная верхняя планка кошту поліса ў цэлым у Расеі складае 4942 рублі. З новага года яна можа падняцца да 6,9 тысячы рублёў (+40%), а з кастрычніка 2020 года – да 9 тысячаў рублёў (яшчэ +30%). Такім чынам, аўтастрахоўка для рэгіёнаў, дзе заробкі грамадзянаў невысокія, а ў аўтапарку пераважаюць старыя "Жыгулі", упершыню скочыць на 82%. У такіх гарадах, як Байканур, Буйнакск, Хасавюрт, Дэрбент, Махачкала, Каспійск і Грозны, максімальная стаўка АСАГА вырасце больш чым удвая, паколькі цяпер там рэгіянальны каэфіцыент дазваляе рабіць зніжку кіроўцам на 30–40%.

Паслуга страхавання з тэлематычным датчыкам цяпер распаўсюджаная ў сегменце аўтастрахавання каско. Страхавальнікі першапачаткова прадаюць кліенту поліс з максімальным тарыфам, але калі апошні хоча атрымаць зніжку, яму прапануюць бясплатна ўсталяваць тэлематычны GPS/ГЛОНАСС-трэкер. З ягоных паказанняў вызначаецца патэнцыйная рызыка ДТЗ кіроўцы і вылічваецца зніжка.

Грашовая розніца пералічваецца кіроўцу на рахунак. Самі датчыкі ўсталёўваюцца без якіх-небудзь даплатаў з боку кіроўцы і здымаюцца праз адзін або некалькі месяцаў.