Калякін заклікаў грамадзян супрацьстаяць фальсіфікацыям

Каардынатар кампаніі «За справядлівыя выбары» Сяргей Калякін заклікаў людзей Беларусі фіксаваць усе факты парушэнняў і падтасовак.

Такі зварот да грамадзян Беларусі лідар партыі «Справядлівы свет» зрабіў 11 лістапада, піша «Беларускі партызан».

«На жаль, улады не дэманструюць сёння ніякага прагрэсу. Гэта абсалютна законнае права (забяспечыць участкі празрыстымі скрынямі), і не патрэбны нам тут Цэнтрвыбаркам. Ёсць яшчэ адзін артыкул Выбарчага кодэкса - 51-ы, арганізацыя галасавання на ўчастках, дзе напісана, што «адказнасць за арганізацыю галасавання, за забеспячэнне абсталяваннем памяшкання ляжыць на ўчастковых камісіях. Таму мы заклікаем прадпрымальнікаў выходзіць напрамую на ўчастковыя камісіі. Калі будуць адмаўляць - значыць, будуць фальсіфікацыі. Гэта сігнал, што ўлады будуць зноў брутальна фальсіфікаваць выбары. Тым больш, што справы ў іх дрэнныя: узровень падтрымкі Лукашэнкі, у адрозненне ад папярэдніх выбараў, чым бліжэй да выбараў - тым меншы. Так, ён цяпер лідар гонкі, але ні ў якім разе не можа быць пераможцам ўжо ў першым туры, гэта ўжо абсалютна зразумела. Можа быць як у анекдоце. Прыходзіць да яго пасля выбараў чыноўнік і кажа: ёсць дзве навіны, добрая і дрэнная. Дрэнная ў тым, што ў нас ніхто не прагаласаваў, а добрая - вы, як заўсёды, перамаглі. Так забяспечыць перамогу сёння ўлада можа. Але мы павінны гэтаму перашкаджаць», - заявіў Сяргей Калякін.

Ён заклікаў выбарнікаў актыўна далучацца да кампаніі «За справядлівыя выбары».

«На сайце АДС знойдзеце старонку «Справядлівыя выбары». У онлайн-рэжыме вы можаце стаць удзельнікам кампаніі, запоўніўшы анкету, вы можаце напрамую даслаць нам факты парушэнняў, прыклаўшы дакументы, аўдыё-, фота- і відэаматэрыялы. Працэс ужо пайшоў», - адзначыў Калякін.