У Беларусі зарэгістраваны «Ордэн меншых братоў капуцынаў»

Гэты манаскі ордэн быў заснаваны ў 1525 годзе.

Пра дзяржаўную рэгістрацыю рэлігійнай арганізацыі «Рымска-каталіцкая манаская супольнасць „Ордэн меншых братоў капуцынаў“» паведамляе партал Рымска-каталіцкага касцёла ў Беларусі.

Адзначаецца, што 3 сакавіка намеснік упаўнаважанага па справах рэлігій і нацыянальнасцяў Сяргей Герасіменя урачыста ўручыў пасведчанне аб дзяржаўнай рэгістрацыі брату Алегу Шэндзе OFMCap, вышэйшаму настаяцелю ордэна.

«Супольнасць братоў капуцынаў на тэрыторыі сучаснай Беларусі з’яўляецца адной з самых маладых; яе прысутнасць на нашай зямлі пачалася ў 1938 годзе ў невялікай мясцовасці Пералом на Гродзеншчыне. Перыяд ваенных ліхалеццяў і пазнейшых пераследаў вытрымалі толькі двое капуцынаў, якія не былі святарамі. Дзякуючы вернасці свайму пакліканню і стараннаму служэнню ў няпростых абставінах, яны дачакаліся наступных пакліканняў, якія тады нараджаліся яшчэ ва ўмовах канспірацыі», — паведамляе партал.

У сакавіку 1997 года была ўтворана Віцэправінцыя Беларусі, апеку над якой ажыццяўляла Варшаўская правінцыя капуцынаў. У 2013 годзе Віцэправінцыя была рэарганізавана ў Кустодыю Беларусі.

Супольнасці капуцынаў пры каталіцкіх парафіях дзейнічаюць у аграгарадку Ліпнішкі (Іўеўскі раён, Гродзенская вобласць), у Докшыцах (Віцебская), у Маладзечне і Смалявічах (Мінская), а таксама ў вёсцы Копішча Мінскага раёна.

З 2017 года Кустодыя апякуецца беларускімі капуцынамі ў Вільні, з 2024-га — у Варонежы (РФ).

«На рахунку беларускіх капуцынаў ёсць таксама некалькі гадоў місіянерскага служэння ў Габоне і Грузіі», — адзначае партал Рымска-каталіцкага касцёла ў Беларусі.

Ордэн меншых братоў капуцынаў — манаскі ордэн, заснаваны Матэа Басі ў 1525 годзе як галіна францішканскага ордэна. Зацверджаны ў 1528 годзе папам Кліментам VII.

Дзяржаўную перарэгістрацыю ў Беларусі прайшло 3 426 рэлігійных арганізацый, у выніку іх колькасць скарацілася на 4,6% (да перарэгістрацыі было 3 592), паведаміла 8 кастрычніка 2025 года ініцыятыва «Хрысціянская візія».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]