Пол Макартні вярнуўся на Данджэн-лейн

Ён анансаваў новы альбом пра Ліверпул і выпусціў песню пра сяброўства з Ленанам.

Пол Макартні абвясціў, што выпускае свой першы сольны альбом за апошнія шэсць гадоў. Музыкант кажа, што пласцінка The Boys Of Dungeon Lane дазволіць слухачам зазірнуць у некаторыя яго ўспаміны, «якімі ён ніколі раней не дзяліўся», перадае Бі-бі-сі.

Назва альбома (яе можна перакласці з англійскай як «Хлопцы з „Данджэн-лейн“») — гэта адсылка да вуліцы ў ліверпульскім раёне Спік, якая вядзе да заліва ракі Мерсі. На ёй Макартні яшчэ хлопчыкам любіў праводзіць вечары, назіраючы за птушкамі.

Першы сінгл з новага альбома Days We Left Behind (то бок «Дні, якія мы пакінулі пазаду») ужо апублікаваны на стрымінгавых платформах, а таксама ўпершыню прагучаў у радыёэфіры на рэгіянальнай ліверпульскай радыёстанцыі Бі-бі-сі BBC Radio Merseyside.

У гэтай акустычнай баладае, вытрыманай у сумных і настальгічных танах, 83‑гадовы Макартні ўспамінае пра «пракураныя бары і танныя гітары» сваёй маладосці. Хоць Ліверпул увесь час змяняецца, «нічога не можа сцерці дні, якія мы пакінулі пазаду».

Макартні спявае далікатным фальцэтам, які нагадвае пра ягоны ўзрост, але адначасова надае кампазіцыі моцнае эмацыйнае гучанне.

У «сярэдняй васьмёрцы» (гэты элемент песні таксама вядомы як «брыдж», ён звычайна ідзе пасля некалькіх куплетаў і прыпеву перад канцоўкай) Макартні дзяліцца вельмі асабістымі ўспамінамі пра зараджэнне «Бітлз» і сяброўства з Джонам Ленанам. Ён узгадвае свой дом, дзе вырас і дзе разам з Ленанам напісаў свае першыя песні.

«Мы сустракаліся на Фортлін-роуд/І пісалі таемным шыфрам/Ўслых пра гэта не казалі», — спявае Макартні.

«Для мяне гэта ў асноўным песня-ўспамін, — расказаў Макартні пра Days We Left Behind у сваім прэс-рэлізе. — Я часта пытаю сябе, ці не пішу я толькі пра мінулае. Але калі падумаць, ці можна ўвогуле пісаць пра нешта іншае?»

Тэкст песні музыкант каментуе так: «Там шмат успамінаў пра Ліверпул. У нас тады амаль нічога не было, але гэта не мела ніякага значэння, бо вакол былі цудоўныя людзі, і мы нават не заўважалі, што ў нас нічога не было».

Амерыканскі прадзюсар і новы акорд

The Boys Of Dungeon Lane стане 19‑м сольным альбомам Макартні. А з моманту, калі Макартні пачаў сваю кар’еру, што перавярнула сучасную музыку, мінула ўжо 63 гады.

Папярэдні сольны альбом Пола Макартні McCartney III выйшаў у 2020 годзе. Музыкант запісаў яго ў адзіночку, галоўным чынам падчас кавіднага лакдаўну (які ён жартам назваў «рокдаўнам»). На гэтай пласцінцы ён сыграў на ўсіх інструментах — і самастойна ж яе спрадусіраваў.

Альбом The Boys Of Dungeon Lane быў створаны разам з амерыканскім прадзюсарам Эндру Ватам, вядомым паспяховай працай з іншымі рок-ветэранамі, такімі як Озі Осборн і «Ролінг Стоўнз».

Насамрэч менавіта Макартні пазнаёміў Вата з «ролінгамі» перад тым, як яны пачалі працаваць над альбомам 2023 года Hackney Diamonds. Тады ён ужо супрацоўнічаў з Ватам і рыхтаваў разам з ім да выхаду свае новыя песні.

Упершыню яны сустрэліся ў 2021 годзе, «каб папіць чаю і абмяняцца ідэямі», — гаворыцца ў прэс-рэлізе Макартні: «Падчас сустрэчы Пол пачаў граць на гітары — і выпадкова натрапіў на акорд, які не здолеў адразу распазнаць — пры тым, што ён — самы паспяховы сёння жывы аўтар песень у свеце. Але гэта яго не збянтэжыла, і, дзякуючы сваёй эксперыментатарскай натуры, Пол стаў змяняць адну ноту за адной, пакуль не атрымаўся шэраг з трох акордаў. Ват прапанаваў яго запісаць».

«Гэтая сесія прывяла да з’яўлення першай песні альбома пад назвай As You Lie There, — паведамляе прэс-рэліз. — Пры падтрымцы свайго новага прадзюсара Пол фарміраваў гэты запіс, граючы на большасці інструментаў — фактычна ў духу свайго дэбютнага сольнага альбома 1970 года McCartney».

Для запісу новага альбома спатрэбілася некалькі гадоў.

Макартні даводзілася сумяшчаць працу над ім з мноствам іншых праектаў: пастаяннымі канцэртнымі выступамі, падрыхтоўкай дакументальнага фільма пра «Бітлз» Get Back і напісаннем мемуараў пра групу Wings, з якой ён выступаў у 1970-я гады.

Нядаўна Макартні таксама атрымаў узнагароду Grammy за песню Now and Then — апошні ў гісторыі сінгл «Бітлз», створаны на аснове дэма-запісу Ленана, апрацаванага з дапамогай сучасных тэхналогій.

Прэс-рэліз абяцае, што новая музыка Макартні будзе ўтрымліваць элементы ўсёй спадчыны музыканта — ад «року ў стылі Wings» і «гармоній у стылі „Бітлз“» да «нумароў у стылі Макартні».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]