ЗША адправілі дэсантны карабель USS Tripoli з марпехамі на Блізкі Усход

Карабель здольны на тое, што не па сілах авіяносцам.

Шматмэтавы дэсантны карабель USS Tripoli (LHA-7) тыпу America пакінуў базу ў японскім Сасэбо і накіроўваецца на Блізкі Усход. На борце знаходзіцца 31-ы экспедыцыйны атрад марской пяхоты – каля 2500 марскіх пяхотнікаў разам з авіяцыйным і баявым кампанентам. Паводле слоў амерыканскіх чыноўнікаў, перакідка гэтага фарміравання зойме ад адной да двух тыдняў.

На практыцы гэта азначае, што ў водах Блізкага Усходу з'явіцца адно з самых гнуткіх фарміраванняў хуткага рэагавання ў свеце, піша Portal Stoczniowy.

На борце карабля знаходзяцца, у прыватнасці, знішчальнікі F-35B, здольныя да вертыкальнай пасадкі, транспартныя канвертапланы MV-22 Osprey, цяжкія верталёты CH-53K, ударныя верталёты AH-1Z і баявы кампанент марской пяхоты, здольны весці дзеянні як на моры, так і на сушы.

Рашэнне аб адпраўцы падраздзялення было прынята па запыце Цэнтральнага камандавання ЗША (CENTCOM) і ўхвалена міністрам абароны. Аднак сам факт прыняцця гэтага рашэння дэманструе нешта куды больш значнае, чым проста чарговую перадыслакацыю караблёў у рэгіёне.

Магутнасць авіяносцаў — і яе межы

У раёне Блізкага Усходу ўжо дзейнічаюць тры амерыканскія авіяносныя ўдарныя групы. У Чырвоным моры дзейнічае USS Gerald R. Ford, у Аравійскім моры – USS Abraham Lincoln, а ва ўсходняй частцы Міжземнага мора падтрымку забяспечвае USS Harry S. Truman. У выніку гэта азначае больш за 200 палубных самалётаў, каля 20 тысяч маракоў і такую канцэнтрацыю ваенна-марскіх сіл, якой свет не бачыў з часоў вайны ў Пэрсідскім заліве.

Хаця гэты патэнцыял робіць велізарнае ўражанне, яго магчымасці на практыцы даволі выразна акрэслены. Авіяносцы служаць перадусім для вядзення інтэнсіўных авіяцыйных дзеянняў з палубы карабля.

Аднак розніца ў тым, што яны не з'яўляюцца інструментам на ўсе выпадкі. Яны не расчышчаюць мінныя палі, не суправаджаюць танкеры праз вузкія пралівы і не праводзяць спецыяльныя аперацыі ў горнай мясцовасці. Яны таксама не з'яўляюцца платформай для захопу або аховы аб'ектаў на сушы.

USS Tripoli — карабель з іншай філасофіяй дзеяння

Менавіта тут раскрываецца роля USS Tripoli. Караблі тыпу America спраектаваныя як караблі, здольныя праводзіць экспедыцыйныя аперацыі, якія класічныя авіяносныя групы не ў стане рэалізаваць.

Ключавым элементам гэтай канцэпцыі з'яўляецца прысутнасць марской пяхоты. Экспедыцыйны атрад марской пяхоты (Marine Expeditionary Unit) – гэта на практыцы самадастатковае баявое фарміраванне, якое ўключае пяхоту, разведку, сапёраў, спецыялістаў па абясшкоджанні выбуховых прылад і ўласны авіяцыйны кампанент, што забяспечвае хуткую перакідку сіл углыб сушы.

У адпаведнай авіяцыйнай канфігурацыі USS Tripoli можа функцыянаваць у канцэпцыі так званага «маланкавага авіяносца» (Lightning Carrier), што дазваляе базаваць да 20 самалётаў F-35B Lightning II і весці інтэнсіўныя палёты з палубы.

На практыцы гэта прыводзіць да таго, што ў некatorых аналізах караблі гэтага класа называюць «лёгкімі авіяносцамі», хоць фармальна яны застаюцца шматмэтавымі дэсантнымі караблямі тыпу America.

Гэтыя самалёты — адзіныя знішчальнікі пятага пакалення, здольныя ўзлятаць з кароткай палубы і здзяйсняць вертыкальную пасадку. Ім не патрэбныя пускавыя катапульты або тармазныя тросы, якія выкарыстоўваюцца на класічных авіяносцах.

Фактычна гэта дазваляе выкарыстоўваць карабель як платформу для правядзення авіяцыйных аперацый супраць наземных і марскіх мэт, у тым ліку супраць берагавых ракетных батарэй.

Чаму ўсё ж адправілі марпехаў

Хаця авіяцыйны кампанент важны, адпраўка USS Tripoli мае перадусім аператыўнае значэнне на ўзроўні наземных дзеянняў.

Экспедыцыйны атрад марской пяхоты падрыхтаваны да правядзення дэсантных аперацый, дзеянняў у ўрбанізаваным асяроддзі, баёў у падземных збудаваннях або місій па выратаванні закладнікаў. У апошнія гады гэтыя падраздзяленні таксама інтэнсіўна трэніравалі аперацыі ў цяжкадаступнай мясцовасці і хуткую перакідку сіл верталётамі.

На практыцы гэта азначае здольнасць захапіць або ўзяць пад ахову ключавыя аб'екты, якія немагчыма нейтралізаваць аднымі толькі авіяўдарамі.

Аперацыі, якія не выканае авіяносец

З аператыўнага пункту гледжання з'яўленне USS Tripoli высвечвае абмежаванні дзеянняў, заснаваных выключна на авіяцыі.

Хаця амерыканская авіяцыя здольная знішчаць мэты на сушы і праводзіць дзеянні па стрымліванні, гэта не вырашае некалькіх ключавых праблем рэгіёна.

Перш за ўсё ідзе гаворка пра бяспеку суднаходства ў Армузскім праліве. Гэты вузкі транспартны шлях шырынёй усяго некалькі дзясяткаў кіламетраў можа быць паралізаваны нават невялікай колькасцю марскіх мін. У такой сітуацыі ключавымі становяцца здольнасці да суправаджэння гандлёвых суднаў, правядзення спецыяльных аперацый на сушы і хуткай перакідкі сіл, здольных рэагаваць у крызіснай сітуацыі.

Варта адзначыць, што сама перадыслакацыя карабля такога класа шмат што гаворыць пра падрыхтаванасць Узброеных Сіл ЗША. Адпраўка шматмэтавага дэсантнага карабля з шматтысячным кампанентам марской пяхоты не з'яўляецца толькі дэманстрацыяй сілы. На практыцы гэта азначае падрыхтоўку да аперацый, якія не вырашаць адны толькі авіяўдары – ад забеспячэння суднаходства ў раёне Армузскага праліва да экспедыцыйных дзеянняў, што праводзяцца непасрэдна з мора.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]