NYT распавяла пра саюз біржы Binance і крыптакампаніі сям'і Трампа

Прэзідэнта ЗША западозрылі ў канфлікце інтарэсаў.

Крыптавалютны стартап World Liberty Financial, заснаваны сям'ёй прэзідэнта ЗША Дональда Трампа, заключыў негалосны саюз з крыптабіржай Binance, паведамляе The New York Times са спасылкай на даныя аналітыкаў.

Як адзначае выданне, у студзені стартап сям'і Трампа перасягнуў важную вяху — агульны аб'ём абароту яго стэйблкоіна USD1 дасягнуў $5 млрд. У значнай ступені гэты поспех быў дасягнуты дзякуючы саюзу World Liberty Financial з Binance, сцвярджае NYT.

Выданне нагадала, што, прыйшоўшы да ўлады ў 2025-м, Трамп памілаваў заснавальніка Binance Чанпэна Чжао. Гэта было зроблена ў кастрычніку. Пасля памілавання сувязі паміж Binance і сям'ёй прэзідэнта ўмацаваліся, нягледзячы на рост ціску з боку дэмакратаў: некаторыя члены Кангрэса і эксперты па этыцы ўгледзелі ў дзеяннях Трампа канфлікт інтарэсаў. Сам Чжао змог застацца мажарытарным акцыянерам Binance.

З таго часу Binance, найбуйнейшая ў свеце платформа для таргоў лічбавымі валютамі, стала важнейшым рухавіком бізнесу сям'і Трампа, піша NYT: за апошнія два месяцы біржа правяла шэраг маркетынгавых акцый, каб падштурхнуць сваіх кліентаў набываць USD1, цана якога трымаецца на ўзроўні $1 за адзінку. Гэты прынцып дазваляе валюце быць зручным інструментам для транзакцый, тлумачыць NYT.

Аналітычныя кампаніі Arkham і Nansen падлічылі, што з $5 млрд, якія знаходзяцца ў абарачэнні ў выглядзе USD1, каля 85% захоўваецца на рахунках у Binance, нават з улікам таго, што платформа даступная толькі па-за межамі ЗША. У снежні 2024 года біржа перастала прадастаўляць паслугі жыхарам і грамадзянам Злучаных Штатаў з-за ўзмацнення рэгулявання, імкнучыся пазбегнуць патэнцыйных юрыдычных рызык.

«Вялікая частка грошай знаходзіцца на Binance, і заўсёды знаходзілася на Binance. Яны з'яўляюцца асноўнай гандлёвай пляцоўкай для гэтага», — кажа Джонатан Райтэр, сузаснавальнік ChainArgos, яшчэ адной кампаніі, што займаецца апрацоўкай крыптаданых.

У снежні 2025-га, неўзабаве пасля вызвалення Чжао, Binance абвясціла, што яе кліенты цяпер могуць канвертаваць стэйблкоіны іншых кампаній у USD1 без камісіі. Гэта стала значнай саступкай, бо камісіі з'яўляюцца асноўнай крыніцай даходу для крыптабіржаў, тлумачыць NYT. Па сутнасці, Binance значна спрасціла і патаніла для кліентаў куплю валюты, выпушчанай кампаніяй сям'і Трампа.

Таксама Binance дала карыстальнікам магчымасць атрымліваць працэнты са сваіх актываў у USD1: 22 студзеня Binance заявіла, што кліенты, якія захоўваюць стэйблкоіны на сваіх рахунках, атрымаюць узнагароду. На працягу наступнага тыдня аб'ём таргоў 1USD у свеце вырас амаль на $2 млрд.

Прадстаўнік World Liberty Financial заявіў NYT, што ўсе бонусы фінансаваліся крыптакампаніяй Трампа, а не самой Binance. Пагадненне паміж бакамі ён назваў «стандартнай практыкай» для эмітэнтаў стэйблкоінаў.

«World Liberty прадаставіла маркетынгавы бюджэт Binance і іншым біржам лічбавых актываў па-за межамі ЗША, якія патрацілі яго выключна на ўласнае меркаванне», — сказаў ён.

Прадстаўніца Binance, у сваю чаргу, заявіла, што «для буйных біржаў не рэдкасць захоўваць вялікія аб'ёмы пэўных токенаў». Яна адзначыла, што Binance прапануе акцыі для шырокага спектра крыптавалют, а не толькі для USD1.

«Мы вельмі сур'ёзна ставімся да патрабаванняў заканадаўства і нарматыўных актаў і выконваем законы і правілы тых юрысдыкцый, дзе мы працуем», — сказала яна.

Адвакат Чжао са свайго боку абверг наяўнасць канфлікту інтарэсаў. Прэс-сакратарка Белага дома сказала газеце, што актывы Трампа знаходзяцца ў трасце, якім кіруюць яго дзеці, і канфлікту інтарэсаў таксама няма.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]