У Італіі адбіта кібератака хакераў на сайты Алімпіяды ў Мілане

Кіраўнік МЗС назваў гэта «дзеяннямі расійскага паходжання».

Напярэдадні адкрыцця Алімпійскіх гульняў у Мілане і Кортіне італьянскія ўлады паведамілі пра прадухіленне маштабных кібератак. Адказнасць за спробы атак прыпісваюць расійскай групе NoName 057, піша FT.

Нацыянальнае агенцтва Італіі па кібербяспецы (ACN) пацвердзіла, што ў апошнія дні ўдалося адбіць серыю атак, арганізаваных прарасійскімі хакерамі, якія называюць сябе NoName 057.

Іх мэтай было вывесці з ладу сайты Алімпіяды ў Мілане і Кортіне, а таксама рэсурсы некаторых гатэляў у Кортіна-д’Ампецца.

Для гэтага выкарыстоўваліся DDoS-атакі — масавая адпраўка запытаў на серверы, каб перагрузіць іх і зрабіць недаступнымі для карыстальнікаў.

Міністр замежных спраў Італіі Антоніа Таяні, знаходзячыся ў ЗША, паведаміў журналістам, што атакі закранулі і сайты ягонага ведамства, уключна з Пасольствам Італіі ў Вашынгтоне.

«Гэта дзеянні расійскага паходжання», — заявіў Антоніа Таяні, падкрэсліўшы, што ўсе атакі былі адбітыя.

Прадстаўнік ACN дадаў: «Мы ўсе гэтага чакалі. Кібергрупы атакуюць падчас буйных падзей, каб прыцягнуць увагу і ўмацаваць свае пазіцыі».

Цырымонія адкрыцця Алімпіяды адбудзецца ў пятніцу ўвечары, 6 лютага, у Мілане. Як і на папярэдніх Гульнях, пачынаючы з 2022 года, расійская каманда не дапушчана з-за вайны, развязанай дыктатарам РФ Пуціным супраць Украіны.

Аднак у цяперашніх спаборніцтвах возьмуць удзел 13 расійскіх спартсменаў у нейтральным статусе. Для абароны лічбавай інфраструктуры Алімпійскіх гульняў прыцягнуты 40 тэхнічных спецыялістаў ACN, а таксама супрацоўнікі дзяржаўнай паліцыі па барацьбе з кіберзлачыннасцю і прадстаўнікі аргкамітэта.

Генеральны дырэктар ACN Бруна Фраттазі адзначыў, што найбольш шматлікія і настойлівыя атакі ў Італіі здзяйсняюць прарасійскія хакеры, якія атакуюць «еўрапейскія краіны, што праявілі салідарнасць з Украінай і падтрымалі яе ў баявых дзеяннях».

Паводле яго слоў, фіксуюцца тысячы атак супраць міністэрстваў, банкаў, кампаній, органаў дзяржаўнага кіравання, муніцыпалітэтаў, партавых уладаў і транспартных прадпрыемстваў.

Бруна Фраттазі падкрэсліў, што такія атакі часта супадаюць з палітычна значнымі падзеямі.

У якасці прыкладу ён прывёў леташнюю заяву прэзідэнта Італіі Серджыа Маттарэлы, які параўнаў расійскае ўварванне ва Украіну з экспансіянісцкай палітыкай нацысцкай Германіі ў Еўропе падчас Другой сусветнай вайны, пасля чаго адбыліся хакерскія атакі на МЗС Італіі і аэрапорты Мілана.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]