Іран выключылі з ваенных вучэнняў БРІКС+

Пасля пагрозы Трампа ўвесці пошліны.

Пагрозы Дональда Трампа у адносінах да краін, што супрацоўнічаюць з Іранам, прымусілі Паўднёвую Афрыку выключыць яго з ваенна-марскіх вучэнняў, якія каля яе берагоў праводзяць краіны БРІКС+.

ЮАР папрасіла Іран адмовіцца ад актыўнага ўдзелу ў вучэннях «Воля да міру 2026» і адклікаць свае караблі. Ірану прапанавалі статус назіральніка, і ён згадзіўся, піша Business Insider са спасылкай на паведамленне паўднёваафрыканскага выдання News24. Прэторыя папрасіла Тэгеран адмовіцца ад удзелу з-за асцярог, што яго ваенная прысутнасць на фоне масавых выступленняў супраць іранскага рэжыму можа паставіць пад пагрозу гандлёвыя і дыпламатычныя адносіны ЮАР з ЗША.

Гэта адбылося ў той жа дзень, адзначае (Newsweek https://www.newsweek.com/iran-pulls-out-of-naval-exercise-china-russia-11351072), калі Трамп напісаў у сваёй сацсетцы Truth Social: «З гэтага моманту любая краіна, якая вядзе бізнес з Ісламскай Рэспублікай Іран, будзе плаціць пошліны ў памеры 25% па абсалютна ўсіх бізнес-аперацыях з Злучанымі Штатамі Амерыкі. Гэты ўказ з’яўляецца канчатковым і беспаваротным».

Два іранскія ваенныя караблі, што прыбылі на галоўную ваенна-марскую базу ЮАР Сайманс-Таун, цяпер, як чакаецца, будуць выведзеныя да пачатку вучэнняў, паведамляе News24. Імі кіруе Кітай, таксама ўдзельнічаюць ваенныя караблі Расіі, ААЭ і іншых краін.

У ЮАР напружаныя адносіны з адміністрацыяй Трампа, які абвінаваціў улады краіны ў пераследаванні белых фермераў і не запрасіў яе на наступны саміт «Вялікай дваццаткі», які адбудзецца ў ЗША. Амерыканская дэлегацыя не прысутнічала на папярэднім саміце, які адбыўся ў канцы 2025 года ў ЮАР.

Пры гэтым Прэторыя дамагаецца працягнення амерыканскага закона, які дае шэрагу афрыканскіх тавараў бязмытны доступ на рынак ЗША, адзначае Newsweek. Тэрмін дзеяння закона скончыўся ў верасні, але ў снежні Палата прадстаўнікоў Кангрэса ЗША ўнесла законапраект аб яго працягненні.

Каля 2000 чалавек, як пратэстоўцаў, так і супрацоўнікаў сілавых ведамстваў, было забіта падчас пратэстаў, што пачаліся ў канцы снежня, паведаміў у аўторак Reuters іранскі чыноўнік.

Прэзідэнт Еўрапарламента Роберта Метсола, канцлер Германіі Фрыдрых Мерц і прэм’ер-міністр Ірландыі Міхэл Мартын разам з шэрагам іншых еўрапейскіх лідараў заклікалі радыкальна ўзмацніць санкцыі супраць Ірана ў адказ на сілавое падаўленне пратэстаў. «Еўропа павінна дзейнічаць — і дзейнічаць хутка», — заявіла Метсола выданню Politico. Еўракамісія пачала разглядаць варыянты, сярод якіх — прызнанне Корпуса вартавых Ісламскай рэвалюцыі тэрарыстычнай арганізацыяй і ўзмацненне захадаў у дачыненні да прадстаўнікоў рэжыму, адказных за гвалт.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]