Іга Свёнтак на US Open пабіла рэкорд Монікі Селеш
3- 26.08.2025, 20:23
- 2,918
Польская тэнісістка выйграла 65-ы запар стартавы матч на турнірах WTA.
Польская тэнісістка Іга Свёнтак выйшла ў другое кола US Open, апошняга ў сезоне турніру "Вялікага шлема".
У стартавым матчы другая ракетка свету лёгка падолела калумбійку Эміліяну Аранга (84-ы нумар рэйтынгу WTA) з лікам 6:1, 6:2.
Як паведамляе прэс-служба US Open, Свёнтак па колькасці выйграных запар стартавых матчаў на турнірах WTA (65) пабіла рэкорд Монікі Селеш. Толькі на турнірах «Вялікага шлема» полька выйграла ўжо 24 стартавыя матчы запар. Апошні раз падобная серыя была ў яе суайчынніцы Агнешкі Радваньскай (2004-2005).
Наступнай спаборніцай Свёнтак будзе галандка Сюзан Ламенс, 66-я ракетка свету.
US Open скончыцца 7 верасня. Агульны прызавы фонд турніру складае $90 млн.