У Бабруйску руйнуюць дом равіна

Адзін з самых прыгожых драўляных дамоў горада.

Пра руйнаванне дома па вуліцы Карла Лібкнехта, 57 паведаміў партал komkur.info.

Дом быў пабудаваны яшчэ да рэвалюцыі на тагачаснай Сталіпінскай вуліцы. Суседні будынак зонавага дзяржаўнага архіва быў пабудаваны на астатках былой сінагогі, таму найбольш верагодна, што гэты раскошны дом побач належаў сям’і равіна.

Моцны дом меў нарожны знадворны мезанін, паходжанне якога не зусім зразумелае — напрошваецца думка пра сукэ, імправізаваны шацёр, у якім правакліраваныя іўдэі павінны былі прымаць ежу, а ў добрае надвор’е і начаваць падчас святкавання Свята кушчоў (Суккот).

Дом дайшоў да нашага часу ў надзвычай добрым стане, без перабудоў: захавалася зашклёная веранда са двара, дэкор з разьбянымі падзорамі, ліштва з тонка выкананымі каронамі, двайныя дзверы з фігурнымі філенкамі і накладнымі элементамі, складаны каваны навес над уваходам — нічога падобнага больш у горадзе няма.

Калі не браць пад увагу знакаміты асабняк купчыхі Кацнельсон, які быў выкананы па праекце прафесійнага архітэктара, то дом па вуліцы Карла Лібкнехта, 57 — найлепшы ўзор жылой драўлянай народнай архітэктуры ў горадзе, а можа нават ва ўсёй Магілёўскай вобласці.

Як адзначае тэлеграм-канал «Спадчына», будынак быў пазначаны як каштоўная драўляная забудова на гістарычна-архітэктурным апорным плане горада — частцы генеральнага плана Бабруйска, якім вызначаецца ўся каштоўная забудова.

Тым не менш афіцыйнага ахоўнага статусу будынак так і не атрымаў, а перад руйнаваннем ні мясцовыя ўлады, ні краязнаўчы музей не клапаціліся пра тое, каб зняць з дома і захаваць частку драўлянага дэкору і навес, як робяць у Магілёве і Гомелі, дзе сітуацыя з захаваннем драўлянага дойлідства таксама катастрафічная.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]