ISW: Расея будзе спрабаваць збіць фокус сустрэчы Трампа з Пуціным

Пра гэта гаворыць склад дэлегацыі РФ.

Крэмль, імаверна, выкарыстоўвае сённяшні саміт на Алясцы, каб паспрабаваць адцягнуць увагу ЗША ад тэмы мірных перамоў з Украінай і перавесці яго на расейска-амерыканскія дачыненні. Такім чынам Пуцін і дэлегацыя РФ будуць падштурхоўваць адміністрацыю Трампа да вельмі неабходнага для Масквы наладжвання эканамічных стасункаў.

Такі прагноз далі аналітыкі Інстытута вывучэння вайны ў сваёй новай справаздачы.

У ISW мяркуюць, што ўдзел у расейскай дэлегацыі міністра фінансаў РФ Антона Сілуянава і кіраўніка Расейскага фонду наўпроставых інвестыцый Кірыла Дзмітрыева сведчыць аб тым, што Расея, імаверна, паспрабуе зрушыць фокус саміту з тэмы вайны РФ супраць Украіны на патэнцыйныя двухбаковыя эканамічныя пагадненні з ЗША. Ні Сілуянаў, ні Дзмітрыеў не прысутнічалі на папярэдніх расейска-ўкраінскіх перамовах у Стамбуле ў траўні ці чэрвені 2025 года. Аднак Дзмітрыеў удзельнічаў у перамовах паміж ЗША і Расеяй у Стамбуле ў лютым 2025 года. Спецыялісты ISW нагадваюць, што Крэмль часта выкарыстоўваў Дзмітрыева і яго дзелавы досвед, каб прадставіць Расею як нібыта прывабнага эканамічнага партнёра для Злучаных Штатаў. Напярэдадні саміту ў ЗША Дзмітрыеў таксама быў адным з тых, хто фармаваў расейскія наратывы, сцвярджаючы, што Аляска з'яўляецца «гістарычнай часткай Расеі» і спрабуючы прадставіць Расею як сусветную дзяржаву, роўную ЗША, перад сустрэчай Трампа і Пуціна. Крэмль таксама спадзяецца на Сілуянава ў надзеі зменшыць негатыўны ўплыў заходніх санкцый на расейскую эканоміку і спрабуючы пераканаць Захад скасаваць санкцыі супраць Расеі праз іх нібыта неэфектыўнасць (што не адпавядае рэаліям, зазначаюць у ISW). Таму прысутнасць Дзмітрыева і Сілуянава на саміце на Алясцы, магчыма, сведчыць аб спробе Расеі прадставіць саміт як пляцоўку для патэнцыйнай дзелавой угоды.

Іншыя расейскія чыноўнікі таксама дэ-факта пацвярджалі, што Крэмль паспрабуе выкарыстаць саміт на Алясцы для пачатку эканамічных перамоў са Злучанымі Штатамі. Памочнік Пуціна Юры Ушакоў заявіў 14 жніўня, што, акрамя тэмы Украіны, Трамп і Пуцін абмяркуюць двухбаковае супрацоўніцтва «ў гандлёва-эканамічнай сферы», дзе нібыта існуе «вялікі» і «нявыкарыстаны» патэнцыял. Першы намеснік старшыні камітэта расейскай Дзярждумы ў міжнародных справах Аляксей Чэпа заявіў, што Пуцін і Трамп могуць абмеркаваць санкцыі ды іншыя эканамічныя пытанні. Калега Чэпы Святлана Журава, таксама намесніца кіраўніка камітэта Дзярждумы ў міжнародных справах, заявіла, што «Расея і Злучаныя Штаты ў кожным выпадку падпішуць эканамічнае пагадненне» пасля саміту на Алясцы. У ISW уважаюць гэтыя заявы часткай узгодненых намаганняў Расеі, накіраваных на тое, каб выкарыстоўваць саміт на Алясцы для забеспячэння неабходнай эканамічнай дапамогі ад ЗША. Спецыялісты Інстытута вывучэння вайны працягваюць ацэньваць, што ўсе крокі ЗША насустрач прапанаваным Расеяй эканамічным пагадненням пры адсутнасці адначасовых саступак Масквы ва Украіне толькі аслабяць важныя эканамічныя рычагі ўплыву, якія Злучаныя Штаты зараз маюць над Расеяй.

Цяпер фактар моцна аслабленай расейскай эканомікі, які Пуцін «прывязе» на Аляску, дае адміністрацыі Трампа значныя рычагі ўплыву падчас саміту, адзначаюць у ISW. 13 жніўня агенцтва Bloomberg паведаміла, што заходнія санкцыі і перавод эканомікі Расеі на ваенны рэжым сур'ёзна шкодзяць ёй, тады як спробы Пуціна стабілізаваць эканоміку цярпяць няўдачу, бо даходы ад расейскай нафты працягваюць падаць. Падзенне коштаў нафты ў спалучэнні з жорсткімі заходнімі санкцыямі і скарачэннем даходаў ад энэргетыкі стварыла сур'ёзную нагрузку на і без таго праблемны федэральны бюджэт Расеі. Цяпер ён сутыкаецца з самым высокім дэфіцытам бюджэту за 30 гадоў, паведамляе Bloomberg.

Неназваныя чыноўнікі паведамілі агенцтву, што Пуцін неаднаразова патрабаваў паслаблення санкцый у межах усякай дамовы, якая будзе абмяркоўвацца на Алясцы. Паводле ацэнак ISW, гэта сведчыць аб тым, што Пуцін занепакоены станам расейскай эканомікі і імкнецца аблегчыць цяжар, створаны краінамі Захаду. Раней Інстытут вывучэння вайны таксама паведамляў, што сярод расейскіх банкіраў узмацняецца неспакой ростам колькасці «дрэнных» крэдытаў у РФ. Гэты факт падрывае сталыя заявы Пуціна аб тым, што ні вайна ва Украіне, ні заходнія санкцыі не шкодзяць расейскай эканоміцы.

Фінансавая нагрузка на расейскую эканоміку падрывае здольнасць Крамля працягваць вайну ў доўгатэрміновай перспектыве, з’ядае рэзервы і агаляе далікатнасць эканомікі РФ. Трамп раней пагражаў другаснымі санкцыямі і новымі тарыфамі тым краінам, якія яшчэ працягваюць імпартаваць расейскую нафту. Паводле ацэнак ISW, гэта, імаверна, мела б яшчэ б найвялікшы ўплыў на расейскую эканоміку, падрываючы прыбыткі, якія Крэмль выкарыстоўвае для вайны супраць Украіны. Такім чынам, Расея, імаверна, рыхтуе ўмовы, каб паспрабаваць выкарыстоўваць саміт на Алясцы для забеспячэння эканамічных паслабленняў, рэзюмуюць у Інстытуце вывучэння вайны.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]