Кансерватар Каст з трэцяй спробы перамог на выбарах прэзідэнта Чылі

Яго суперніцай была камуністка.

Ультраправы палітык, 59-гадовы Хасэ Антоніа Каст з Рэспубліканскай партыі заваяваў перамогу па выніках другога тура выбараў прэзідэнта Чылі. Як паведаміла ў нядзелю, 14 снежня, выбарчая камісія, пасля падліку 83% галасоў, яго падтрымалі каля 59% выбаршчыкаў, паведамляе «Нямецкая хваля».

Яго асноўная суперніца — сябра Камуністычнай партыі Чылі, кандыдатка ад кіруючага левацэнтрысцкага альянсу, 51-гадовая Жанэт Хара, — ужо прызнала паразу. Яна атрымала каля 41% галасоў і павіншавала апанента ў тэлефоннай размове.

Каст зойме прэзідэнцкую пасаду з трэцяй спробы. У перадвыбарчай кампаніі ён рабіў стаўку на жорсткія меры супраць злачыннасці і нелегальнай міграцыі.

Бацька Каста быў лейтэнантам вермахта і ўцёк з Германіі

Бацькі Каста — Майкл Каст Шындэле і Альга Рыст Хагшпіль — родам з Баварыі. Бацька быў лейтэнантам вермахта і членам Нацыянал-сацыялістычнай нямецкай рабочай партыі, які ўцёк у Чылі падчас дэнацыфікацыі Германіі ў 1950 годзе.

Выступаючы з прамовай пасля першага тура, Каст заявіў: «Мы адновім нашу радзіму». Бацька дзевяці дзяцей і перакананы католік — ён ужо паабяцаў дэпартаваць сотні тысяч нелегальных мігрантаў, пераважна венесуэльцаў.

Першы ультраправы прэзідэнт з часоў Піначэта

Хасэ Антоніа Каст стане першым прадстаўніком ультраправых сіл на пасадзе прэзідэнта Чылі з часоў дыктатуры Аўгуста Піначэта у 1973–1990 гадах.

Каст нарадзіўся ў Сант’яга, вывучаў права ў мясцовым каталіцкім універсітэце і займаецца палітыкай ужо 30 гадоў, нагадала агенцтва AFP. У ходзе сваёй палітычнай кар’еры ён, у прыватнасці, выступаў за забарону абортаў, а таксама супраць экстраннай кантрацэпцыі, разводаў, аднаполых шлюбаў і эўтаназіі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]