Куды прападае Лукашэнка па серадах?

Дыктатару патрабуецца ўсё больш дзён для адпачынку.

Напрыканцы кастрычніка «Зеркало» звярнула ўвагу, што па серадах, якія Аляксандр Лукашэнка звычайна імкнуўся зрабіць для сябе выходнымі дадаткова да суботы і нядзелі, дыктатар нібыта пачаў прымаць чыноўнікаў з дакладамі. Пры гэтым на фотаздымках, апублікаваных па выніках гэтых сустрэч прэс-службай, Лукашэнкі на іх не было. 11 снежня прэс-сакратарка дыктатара Наталля Эйсмонт расказала дзяржаўнаму тэлеканалу «Першы інфармацыйны», куды ж па серадах «прападае» яе начальнік.

Публічна пракаментаваць анамалію ў графіку Лукашэнкі яе прэс-сакратарка вырашыла, каб «расставіць усе кропкі над і».

— Нічога надзвычайнага, нічога незвычайнага і нічога непрывычнага! Гэта праца, якая ідзе пастаянна ўжо даволі доўгі час. Некаторыя даклады мы ў сродках масавай інфармацыі асвятляем, некаторыя [даклад] мы даём чыста тэматычныя, але гэта таксама вельмі важны працэс для таго, каб уся краіна чула і разумела, пра што дакладваюць… <...> Вось гэта самае галоўнае. Гэта мэта такой працы, — заявіла Эйсмонт.

Прэс-сакратарка дадала, што ёсць і даклады Лукашэнкі, пра якія ў дзяржСМІ «шырока» не паведамляецца.

— Такіх дакладаў у нас значна больш, чым тых, што мы медыйна асвятляем, — паведаміла Эйсмонт.

Чаму з такіх «дакладоў па серадах» прэс-служба Лукашэнкі не публікуе фота і відэа з удзелам узурпатара, прэс-сакратарка не патлумачыла.

Дарэчы, чым займаўся Лукашэнка ў сераду на гэтым тыдні, сказаць складана. На яго сайце за 10 снежня толькі адна публікацыя — віншаванне калектыву Беларускага нацыянальнага тэхнічнага ўніверсітэта. У тэлеграм-канале яго прэс-службы ў гэты дзень не выходзіла ніякіх пастоў.

У каментары для дзяржаўнага тэлеканала «Першы інфармацыйны» Эйсмонт заявіла, што ў мінулую сераду Лукашэнка абмяркоўваў «важныя пытанні» з «некаторымі профільнымі міністрамі», а яшчэ «паглыбіўся ў падрыхтоўку Усебеларускага народнага сходу».

Тое, што Аляксандр Лукашэнка стараецца адпачываць у сярэдзіне тыдня, яшчэ чатыры гады таму заўважылі журналісты. Тады яны вывучылі яго графік і прыйшлі да высновы, што серада — самы свабодны дзень працоўнага тыдня Лукашэнкі. А ў выходныя ён, за рэдкім выключэннем, таксама адпачывае.

Мінулай вясной журналісты вярнуліся да тэмы, і аказалася, што сваёй звычцы Лукашэнка не змяніў — стандартна ў гэты дзень нідзе публічна не з’яўляўся. Яго прэс-служба, як правіла, паведамляла, што ўзурпатар «працуе з дакументамі».

Так было аж да апошняга часу. Напрыклад, у сераду, 27 жніўня 2025 года, на сайце Лукашэнкі з’явілася паведамленне, што ён павіншаваў «народ Малдовы» з Днём незалежнасці. 10 верасня яго прэс-служба паведаміла, што ўзурпатар накіраваў віншаванне з днём нараджэння Ларысе Далінай і падпісаў некалькі ўказаў. У сераду, 24 верасня, ніякай актыўнасці ўвогуле не было, а 1 кастрычніка зноў толькі папяровая праца — віншаванні і падпісанне дакументаў.

Цяпер па серадах беларусам паведамляюць, што Лукашэнка прымае чыноўнікаў з дакладамі. Пасля тыя распавядаюць падрабязнасці прапагандыстам дзяржСМІ. Вось толькі кадраў з тых сустрэч, на якіх быў бы зафіксаваны Лукашэнка, людзям не паказваюць.

Выключэнне з гэтага правіла — серады, на якія ў Аляксандра Лукашэнкі выпадаюць камандзіроўкі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]