У Польшчы паставілі беларускаму рэжыму ультыматум
41- 22.07.2024, 14:32
- 86,020
![У Польшчы паставілі беларускаму рэжыму ультыматум](https://i.c97.org/ai/603798/aux-head-1721666344-20240101_skriin_360.jpg)
Ёсць тры ўмовы.
Намеснік міністра замежных спраў Польшчы Анджэй Шэйна ў эфіры Radio Zet назваў умовы для нармалізацыі стасункаў з Беларуссю. Паводле ягоных слоў, польскі бок паступова спее, каб закрыць мяжу для руху грузаў.
“Ёсць некалькі ўмоў: першая ўмова - гэта спыненне гібрыдных нападаў на мяжы, другая ўмова - вызваленне палітычных зняволеных, асабліва мы гаворым пра Пачобута і палякаў, і наогул пра палітвязняў, і трэцяя - выдача забойцы польскага салдата, каб ён быў належна асуджаны ў Польшчы”, - сказаў ён.
Намеснік міністра зазначыў, што Польшча мае інструменты для ціску на Менск.
"Напрыклад, гаворым аб гэтым ясна, калі не будуць выкананы ўмовы, аб якіх мы згадалі, мы можам затрымаць транспартаванне тавараў з Беларусі ў Польшчу", - сказаў ён.
Акрамя таго, паводле ягоных слоў, размова можа ісці таксама аб пашырэнні санкцый.