На Сонцы адбыўся самы магутны выбліск за лета
4- 16.07.2024, 21:32
- 10,396
Метэазалежным падрыхтавацца.
У аўторак, 16 ліпеня, блізу 16:30 паводле менскага часу навукоўцы зарэгістравалі выбліск найвышэйшага класу X на Сонцы. Выбліск стаў самым магутным з тых, якія былі зафіксаваныя за гэты летні перыяд.
На Сонцы зарэгістраваны другі за два дні выбліск найвышэйшага ўзроўню X. Падзеі прысвоены бал X1.9.
Дарэчы, актыўнасць Сонца пачала заўважна расці прыкладна з 12 ліпеня. За апошнія чатыры дні адбылося больш за дзесяць выбліскаў узроўню М (чацвёрты ў сіле ўзровень магутнасці сонечных падзей паводле пяцібальнай шкалы), а таксама два выбліскі найвышэйшага бала X (у тым ліку сённяшняя).
Наступствы выбуховых падзей на Сонцы могуць назірацца да канца дня. Пакуль няма звестак пра выкіды сонечных масаў у бок Зямлі, але размяшчэнне выбуховага цэнтра не выключае такой магчымасці.
Метэазалежныя людзі ў такія перыяды могуць адчуваць хваробныя станы. А рэч у тым, што сонечныя выбліскі выліваюцца ў магнітныя буры, што, у сваю чаргу, можа адбіцца на стане здароўя некаторых людзей.