Ураган абрынуўся на гарады і вёскі Беларусі
8- 13.07.2024, 20:48
- 39,544
![Ураган абрынуўся на гарады і вёскі Беларусі](https://i.c97.org/ai/338699/aux-head-1561206448-20190622_pogoda_mordor_360.jpg)
Ёсць ахвяры.
Моцныя залевы і ўраганны вецер разбушаваліся ў Беларусі. Найбольш ад непагадзі пацярпелі Гарадзенская і Менская вобласці. Амаль пяць сотняў населеных пунктаў заставаліся без святла.
Як паведамляюць спецыялісты Рэспубліканскага цэнтра арганізацыі медрэагавання Міністэрства аховы здароўя, медыкі аказваюць неабходную дапамогу пацярпелым падчас буры і шквалістага ветру ў Менску, у Ждановічах і на Цнянскім вадасховішчы.
На шляху з Гальшан у Жамыслаўль і Іўе вельмі шмат паваленых дрэваў. Быў моцны вецер, тэмпература пасля дажджу апусцілася да 22 градусаў (паводле тэрмометра ў машыне) pic.twitter.com/MSGurnaDNR
— Шулудзівы храк🤍♥️🤍💙💛 (@Oleg_Neste) July 13, 2024
У выніку падзення дрэва на Цнянскім вадасховішчы пацярпелі тры чалавекі. Брыгады хуткай дапамогі шпіталізавалі двух пацярпелых у Менскую абласную бальніцу і РНПЦ траўматалогіі і артапедыі.
![](https://i.c97.org/ai/602737/aux-1720892893-screenshot_3_derevo_aranskaya_130724.jpg)
«На жаль, у выніку падзення дрэва ў раёне Цнянкі загінула дзяўчына», – паведамілі ў Міністэрстве аховы здароўя.
Крыху раней у Ждановічах, таксама ад падзення дрэва пацярпела дзіця. Яно шпіталізаванае ў РНПЦ неўралогіі і нейрахірургіі.
У цэнтры Менска праз падзенне шкла ад парыву ветру каля завода «Гарызонт» пацярпеў 24-гадовы малады чалавек і падлетак. Яны шпіталізаваны ў БХМД і 3-ю бальніцу.
У выніку парывістага ветру ў Менску ўпала цагляная сцяна. Пацярпелы, малады чалавек, шпіталізаваны ў Бальніцу хуткай медычнай дапамогі. У хлопца дыягнаставаныя спалучаныя траўмы – ЧМТ сярэдняй ступені, закрытая траўма грудной клеткі, траўма жывата, пераломы костак.
Удзень у Менску тэмпература паветра дасягала 37 градусаў. Пазней пачаўся разгул стыхіі.
На відэа з сацсетак і тэлеграм-каналаў бачна, што ў Менску ўпала дрэва на веладарожку паблізу вуліцы Аранскай. У іншым раёне гораду таксама ёсць паваленыя дрэвы. Таксама заўважаны як мінімум два рэкламныя шчыты, якія пашкодзіў моцны вецер.
Са слоў відавочцаў, у раёне Цнянкі вецер зламаў дрэва і яно ўпала на людзей. Пад ударам непагадзі аказалася і Новая Баравая. Паводле паведамленняў жыхароў горада, у некаторых раёнах аварыйна адключылі электрычнасць. Напрыклад, у раёне вуліц Казінца і Каржанеўскага – яно павінна працягнуцца да 20.06.
Непагадзь разгулялася не толькі ў сталіцы – напрыклад на дарозе паміж Ашмянамі і Лідай, са слоў відавочцы, вельмі шмат паваленых дрэў. А тэмпература пасля дажджу апусцілася да 22 градусаў.
Моцны вецер часткова разбурыў кемпінг «Клёвае месца» у Вілейскім раёне.
Стыхія таксама прайшлася па Мсціслаўскім раёне.
Паводле звестак Белгідрамета, у суботу, 13 ліпеня, навальніцы ў паўночных і цэнтральных раёнах краіны павінны працягнуцца прыкладна да 21.00. У прагнозе былі моцныя залевы, град і шквалістае ўзмацненне ветру парывамі 15-20 м/с, у асобных раёнах 21-24 м/с.
Нагадаем, на нядзелю, 14 ліпеня, у Беларусі аб'явілі аранжавы ўзровень небяспекі праз спякоту. Уначы месцамі, раніцай і ўдзень на большай частцы тэрыторыі пройдуць кароткачасовыя дажджы. У асобных раёнах навальніцы. Вецер пераменных кірункаў умераны, пры навальніцах парывісты, уначы месцамі моцны парывісты.