ЦНС: Лукашэнка рыхтуе правакацыі на мяжы з Украінай
27- 13.07.2024, 11:50
- 30,368
![ЦНС: Лукашэнка рыхтуе правакацыі на мяжы з Украінай](https://i.c97.org/ai/448616/aux-head-1640261333-20211202_luka_anadolu_360.jpg)
Сталі вядомыя планы беларускіх сілавікоў.
Беларускія сілавыя ўстановы рыхтуюць правакацыі на мяжы з Украінай пад чужым сцягам, каб паказаць кітайцам здольнасць уласных органаў бяспекі рэагаваць на «нечаканыя» пагрозы. Пра гэта паведаміў Цэнтр нацыянальнага супраціву.
«Яны плануюць звярнуцца да правакацый, якія самі ж паспяхова папярэдзяць з мэтай паказаць кітайскім калегам свае магчымасці», – гаворыцца ў паведамленні.
У Цэнтры нацсупраціву ўдакладнілі, што з 8 да 19 ліпеня на тэрыторыі Беларусі праходзяць першыя супольныя «антытэрарыстычныя» вучэнні беларускіх сілаў спецыяльных аперацый і вайскоўцаў Кітая.
Напярэдадні вучэнняў намеснік кіраўніка генеральнага штаба УС Беларусі Уладзімір Купрыянюк заявіў пра пагрозу ўзброеных правакацый «ва ўмовах нарошчвання прысутнасці падраздзяленняў спецыяльнага прызначэння, наймітаў і розных добраахвотніцкіх фармаванняў у памежных раёнах».
«Гэтая заява была закліканая падрыхтаваць інфармацыйнае поле для правядзення беларускім бокам уласных правакацый, бо яму будзе вельмі выгадна ў кантэксце ўступлення Беларусі ў Шанхайскую арганізацыю супрацоўніцтва (ШАС) і першых супольных антытэрарыстычных вучэнняў з НВАК (Народна-вызваленчая армія Кітая, — рэд.) паказаць здольнасць уласных органаў бяспекі да рэагавання на пагрозы», – растлумачылі ў ЦНС.
Паводле звестак Цэнтра нацсупраціву, у планах у беларускіх сілавікоў «паспяхова прадухіляць узброеныя правакацыі» ўздоўж украінска-беларускай мяжы, пасля чаго яны паспрабуюць абвінаваціць ва ўсім Украіну.