Расейскія ўлады схавалі звесткі аб самалётах сваіх авіякампаній

Навошта такая сакрэтнасць?

Расавіяцыя перастала публікаваць звесткі аб колькасці самалётаў у парках расейскіх авіякампаній, ведамства паказвае толькі тып паветранага судна, якое эксплуатуе перавозчык, піша РБК.

У леташняй версіі «Рэестра эксплуатантаў і паветраных суднаў» была пазначаная графа аб тыпах і колькасці самалётаў, якая ў існай рэдакцыі дакумента адсутнічае. Год таму там значыліся 116 расейскіх кампаній, якія ажыццяўляюць камерцыйныя авіяперавозкі, лічылася 2228 самалётаў і верталётаў.

Выданне адзначае, што на сайце Адзінай міжведамаснай інфармацыйна-статыстычнай сістэмы (АМІСС) публікуюць паквартальныя звесткі аб колькасці паветраных суднаў, якімі валодаюць перавозчыкі. У чацвёртым квартале 2022 года агульны парк складаў 1902 паветраныя судны, тады як у паказчыках за 2023 год колькасць паветраных суднаў памяншалася да 1793.

Як адзначае партал ATO.ru, паводле звестак на першы квартал гэтага года, расейскія авіякампаніі валодаюць 1772 суднамі. У АМІСС улічваюцца не толькі паветраныя судны, якія выкарыстоўваюцца для камерцыйных авіяперавозак. Звесткі для гэтай базы падае Расавіяцыя.

«Адсутнасць колькасці паветраных суднаў па кожнай авіякампаніі на публічным інтэрнэт-сайце агенцтва звязаная з неабходнасцю аптымізацыі публікуемай інфармацыі», – удакладнілі ў Расавіяцыі. Там дадалі, што пералік колькасці паветраных суднаў даступны ў рэестры, а само ведамства праводзіць палітыку інфармацыйнай адкрытасці.

У сярэдзіне траўня старэйшы віцэ-прэзідэнт Utair Дзмітрый Белаконь заявіў «Коммерсанту», што расейскім авіякампаніям становіцца ўсё цяжэй падтрымліваць лётную прыдатнасць наяўных самалётаў праз санкцыі і старэнне парку. Перавозчыкі маюць патрэбу ў новых лайнерах, але згодныя і на патрыманыя.

Са слоў топ-мэнэджара, самастойна авіякампаніі купіць і завезці ў краіну ніякія самалёты не могуць. Пры гэтым утылізацыя флоту ўжо знаходзіцца на лімітавым узроўні, а айчынных распрацовак давядзецца чакаць занадта доўга - сама меней да 2026 года. Белаконь заклікаў улады звярнуць увагу на праблему і надаць садзейнічанне ў яе развязанні.

Сярод іншага, Белаконь прапанаваў завозіць у Расею патрыманыя самалёты па прыкладзе Ірана, «пакуль няма сваіх». На ягоную думку, толькі так можна падтрымліваць і разганяць попыт на авіяперавозкі.

Паводле звестак Расстата, за першую палову 2023 заводы здалі заказчыкам толькі два мірныя самалёты, а ўсе праграмы ўласнай вытворчасці сутыкнуліся з затрымкамі. Выпуск лайнераў MC-21 не атрымоўваецца наладзіць праз недахоп кампазітных дэталяў, якія раней пастаўляла «дачка» «Расатама» Umatex, якая трапіла пад санкцыі, а слабым месцам турбавінтавога Іл-114-300 апынуўся рухавік ТВ7-117СТ. Ён так і не прайшоў лётныя выпрабаванні і нават прывёў да катастрофы вайскова-транспартнага самалёта Іл-112В.

Пры гэтым праграма развіцця авіятранспартнай галіны патрабуе павялічыць выпуск мірных лайнераў у 46 разоў. Нягледзячы на санкцыі і адсутнасць доступу да заходніх тэхналогій, да 2026 года, на задуму чыноўнікаў урада, у Расеі павінна выпускацца ўжо 120 цывільных самалётаў, у 2028-м - 200, а ў 2030-м - больш за 230.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]