Войска РФ нанесла ракетны ўдар па Украіне, выкарыстоўваючы тэрыторыю Беларусі

Гэта было зроблена за сёння як мінімум два разы.

Войска РФ сёння ноччу нанесла ракетны ўдар па Украіне, выкарыстоўваючы тэрыторыю Беларусі, паведамляе «Флагшток».

Пра інцыдэнт з перасячэннем украінска-беларускай мяжы паведамілі два ўкраінскія маніторынгавыя каналы, звязаныя са службамі супрацьпаветранай абароны Украіны.

Сёння ноччу ў 4:12 тг-канал War monitor паведаміў:

«Трэцяя група КР [крылатых ракетаў] перасекла мяжу Беларусі і не назіраецца».

Праз 8 хвілінаў прыйшло ўслед удакладненне:

«Трэцяя група ракетаў ці ракета знікла на мяжы з Беларуссю. Мы не можам сцвярджаць, што яна перасякала яе і зайшла ў паветраную прастору РБ».

Паведамленні пра выкарыстанне паветранай прасторы Беларусі з'явіліся ў Тг-канале «Український Єнот» 22 чэрвеня ў 4:11:

«Новая група [ракетаў] ішла па мяжы з Беларуссю, перасякаючы яе».

Пасля заканчэння атакі гэты ж канал рэзюмаваў, што Лукашэнка па-ранейшаму дапускае манеўры расейскіх ракетаў уздоўж дзяржмяжы Беларусі і Украіны.

У каментары Флагштоку маніторынгавы канал «Український Єнот» удакладніў, што тэрыторыю Беларусі ноччу 22 чэрвеня ракеты х-101 перасякалі як мінімум два разы:

«Першая ракета зафіксаваная ў 3:40 [пазначаная чырвоным колерам]. Другая група ішла пазней [пазначаная сінім]. Недзе ў раёне Чарнобыльскай зоны яна знікла, далей з'явілася ў Ровенскай / Валынскай вобласці і на Луцк зайшла».

У адпаведнасці з звесткамі маніторынгавай групы «Український Єнот», ракеты прайшлі над Брагінскім раёнам Гомельскай вобласці ў раёне пасёлка Камарын.

Паветраныя сілы УСУ паведамілі, што ўсяго за ноч 22 чэрвеня 2024 г. расейскае войска выпусціла па ўкраінскай тэрыторыі 16 ракетаў розных тыпаў і 13 дронаў. Украінскія вайскоўцы збілі 12 ракетаў і ўсе беспілотнікі.