«Пуцін моліцца сам на сябе»

На схаванай здымцы паказалі дабудаваны палац кіраўніка РФ у Геленджыку.

Расейскі Фонд барацьбы з карупцыяй 6 траўня апублікаваў відэа, знятае схаванай камерай у сакрэтным палацы прэзідэнта РФ Уладзіміра Пуціна ў Геленджыку.

Аўтары новага расследавання паведамляюць, што рамонт палаца закончыўся ў лютым-сакавіку 2023 года. Ён па-ранейшаму прызначаны для Пуціна, гавораць у ФБК.

Журналісты апісваюць, што можна ўбачыць у сакрэтным палацы: «Спальні, кабінеты з урадавай сувяззю, спартзала, крыясаўны і нават хатняя капліца, дзе мы ацэнім сапраўдную ступень яго вар'яцтва і ўбачым, што Пуцін моліцца сам на сябе. Сёння мы даслоўна ўварвёмся да Пуціна дадому і пакажам вам, кім ён з'яўляецца напраўду – звар'яцелым старым дыктатарам, які нават падчас развязанай ім жа самім вайны не можа спыніцца і працягвае будаваць сабе палац».

На схаванай здымцы з палаца, акрамя іншага, паказаная аквадыскатэка, асабісты басейн, некалькі відаў душавых пакояў, масажныя кабінеты, хамам, парылка, крыясаўна, спа-зоны, трэнажорная зала, а таксама ўласны тэатр.

Адзначаецца, што ў папярэднім плане «палаца Пуціна» была зала гульнявых аўто, але цяпер яе перарабілі ў капліцу. «Памяшканне дастаткова дэпрэсіўнае. Мармуровая падлога з узорам, цёмныя шпалеры, сцены па перыметры пакоя аздобленыя дэкаратыўнымі металічнымі пано з нейкімі не вельмі праваслаўнага выгляду крыжамі», – кажа журналіст.

Аўтары расследавання звярнулі ўвагу на іканастас з іконамі ў поўны рост. У цэнтры там размешчаны Ісус, злева - Багародзіца, а справа - святы князь Уладзімір. «Тое, што Пуцін не проста асацыюе сябе з князем Уладзімірам, а ўжо лічыць сябе яго пераўвасабленнем, рэінкарнацыяй, сумненняў не выклікае», - сказаў журналіст. Ён адзначыў, што паралелі паміж князем і прэзідэнтам РФ таксама публічна праводзіў патрыярх Кірыл.

У капліцы стаіць крэсла, падобнае на царскі трон, гаворыцца ў расследаванні. «Уявіце, [Пуцін] сядзіць там, у цёмным пакоі, на троне, слухае малітвы і любуецца іконай, як ён думае, самога сябе», - адзначае журналіст.

Шэраг памяшканняў згодна з дакументамі перайменавалі, але прыкметна не перараблялі, таксама гаворыцца ў расследаванні. Спальні сталі «апартаментамі», кальян з тычкай для стрыптызу стаў «лоўнж-зонай».

У былой гасцёўні і чытальні, якія ператварыліся ў «лобі», пасля рамонту значна змяніўся інтэр'ер. Раней на сценах чытальні віселі рамантычныя фрэскі з нейтральнымі сюжэтамі, але зараз іх змянілі рэпрадукцыі карцін гістарычных бітваў, у тым ліку Барадзінскай бітвы і Лядовага пабоішча.

На другім паверсе размешчаны 11 спальняў - чатыры вельмі вялікія, прызначаныя для гаспадароў, астатнія меншыя. На відэа знятыя інтэр'еры спальняў з дарагой мэбляй.