З чэрвеня шэнгенская віза падаражэе да 90 еўраў, але не для ўсіх
1- 24.05.2024, 18:13
- 9,962
![З чэрвеня шэнгенская віза падаражэе да 90 еўраў, але не для ўсіх](https://i.c97.org/ai/533634/aux-head-1674647687-20230125_paszpart_360.jpeg)
Колькі будуць плаціць беларусы.
Еўрапейская камісія пастанавіла павялічыць консульскі збор для атрымання шэнгенскай візы з 11 чэрвеня на 12,5%. Адпаведны дакумент з'явіўся на сайце Еўразвяза. Пра што менавіта гаворыцца ў пастанове і ці закране яна беларусаў?
Пастанову аб унясенні змен у рэгламент ЕЗ наконт сумы візавых збораў прынялі яшчэ 14 сакавіка. Але сам дакумент апублікавалі 22 траўня.
У ім сказана, што Еўракамісія прааналізавала агульны ўзровень інфляцыі і сярэдняга заробку дзяржслужбоўцаў краін ЕЗ з 1 ліпеня 2020 года да 1 ліпеня 2023 года. На падставе гэтага мяркуюць павялічыць суму візавага збору на 12,5%. Цяпер, з 11 чэрвеня, ён складзе 90 еўраў, а для дзяцей ад шасці і да 12 гадоў - 45 еўраў.
Між тым новаўвядзенні ўнеслі ў арт.16 рэгламенту ЕЗ, у якім указаныя стандартныя расцэнкі для атрымання шэнгена: 60 еўраў для дарослых і 35 для дзяцей. Аднак з дакумента не зусім зразумела, ці закране ён Беларусь. Бо для грамадзян нашай краіны з ліпеня 2020 года шэнген каштуе 35 еўраў.
Для ўдакладнення «Зеркало» звярнулася да амбасадара Літвы ў Беларусі ўа асобых даручэннях Асце Андрыяускене.
- Для беларусаў нічога не мяняецца, - запэўніла яна.
У амбасадзе Францыі ў Беларусі таксама пацвердзілі «Зеркалу», што консульскі збор для атрымання шэнгенскай візы застанецца ранейшым.
- Гэтае новаўвядзенне не тычыцца беларусаў, бо ў Беларусі і ЕЗ ёсць асобнае Пагадненне аб спрашчэнні візавага рэжыму, якое набыло моц 1 ліпеня 2020 года. Згодна з ім консульскі збор складае 35 еўраў. Ён аднолькавы для ўсіх беларусаў, якія як пражываюць у краіне, так і знаходзяцца па-за ёй, — адзначылі ў пасольстве.
Нагадаем, ЕЗ і Беларусь падпісалі пакет пагадненняў: аб спрашчэнні візавага рэжыму і рэадмісіі 8 студзеня 2020 года. Яны набылі моц 1 ліпеня таго ж года, спрасціўшы нашым грамадзянам атрыманне кароткатэрміновых віз для ўезду ў ЕЗ. Консульскі збор знізіўся да 35 еўраў (для пэўных катэгорый падарожнікаў яго і ўвогуле скасавалі). А таксама скараціўся максімальны тэрмін, за які консульства павінна прыняць пастанову аб выдачы візы.
У лістападзе 2021 года ЕЗ прыпыніў дзеянне Пагаднення аб спрашчэнні візавага рэжыму паміж ЕЗ і Беларуссю для «афіцыйных асоб рэжыму». Аднак на звычайных грамадзян нашай краіны пастанова аб прыпыненні не распаўсюджваецца.