Папа Рымскі прысвоіў пробашчу Чырвонага касцёла ганаровы тытул

Храм дагэтуль застаецца закрытым.

Папа Францішак прысвоіў настаяцелю Чырвонага касцёла Уладзіславу Завальнюку тытул Капелана Яго Святасці. Гэта адбылося на просьбу мітрапаліта Юзафа Станеўскага з нагоды 50-годдзя святарства кс. Завальнюка, паведамляе «Хрысціянская візія».

Абвяшчэнне прысваення тытула Капелана Яго Святасці адбылося на сустрэчы ксяндзоў у Будславе. Дакумент зачытаў арцыбіскуп Тадэвуш Кандрусевіч, які ўжо некалькі дзесяцігоддзяў ведае кс. Завальнюка.

Наконт гэтага іерарх сказаў: «Ты павінен святкаваць гэты юбілей не толькі ў гэтым касцёле ці ў іншых, але ў Чырвоным. На жаль, не можаш гэтага зрабіць. Не пабаюся сказаць - усе асацыююць чырвоны касцёл з кс. Завальнюком. Спадзяюся, гэтая праблема будзе развязаная. Калі не сёння, то ў іншы дзень».

Каплан Яго Свяцейшаства (лац.: Cappellanis Sanctitatis Suae) — святар, якому Папа прысвоіў гэты тытул. Капеланы называюцца мансіньёрамі і маюць некаторыя прывілеі ў частцы царкоўнага ладу.

Мітрапаліт Станеўскі далучыўся да віншаванняў пробашча касцёла св. Сымона і Алены і пажартаваў, што "ў Беларусі ёсць каталіцкі, гарадзенскі і чырвоны касцёлы".

У канцы верасня споўніцца два гады, як Касцёл св. Сымона і Алены зачынены ўладамі. Храм адключаны ад камунікацый, прыход прымусілі забраць сваю маёмасць. Ніякіх рамонтных прац у храме не праводзіцца.