Politico: ЕЗ пасля ЗША рыхтуе ўласную пастанову аб вайсковай дапамозе Украіне
3- 21.04.2024, 13:04
- 8,848
![Politico: ЕЗ пасля ЗША рыхтуе ўласную пастанову аб вайсковай дапамозе Украіне](https://i.c97.org/ai/462961/aux-head-1649603541-ua_ue_360.jpg)
Пасяджэнне адбудзецца ўжо ў панядзелак.
Еўрапейскія лідары высока ацанілі прыняцце ў ЗША пакета вайсковай дапамогі Украіне на $60,8 мільярда. У той жа час некаторыя папярэдзілі, што Кіеву вельмі патрэбная і дадатковая падтрымка з боку Еўропы напярэдадні, як яны чакаюць, жорсткага наступу войск РФ у найбліжэйшыя месяцы.
Аб гэтым паведамляе выданне Politico.
Паводле яго звестак, перад выхаднымі еўрапейскія хаўруснікі па NATO паабяцалі актывізаваць пастаўкі ўкраінскім сілам гатовых сістэм супрацьпаветранай абароны.
«Я вітаю, што Палата прадстаўнікоў ЗША ўхваліла новы пакет дапамогі Украіне. Украіна выкарыстоўвае зброю, перададзеную хаўруснікамі па NATO, каб знішчыць расейскі баявы патэнцыял. Гэта робіць усіх нас больш бяспечнымі ў Еўропе і Паўночнай Амерыцы», – напісаў у сацсетцы генеральны сакратар Паўночнаатлантычнага альянсу Енс Столтэнбэрг.
Са свайго боку некаторыя еўрапейскія лідары скарысталіся галасаваннем ЗША, каб заклікаць Еўропу не супакойвацца і не губляць імпульс зараз, пакуль Кіеў яшчэ чакае паступлення новай амерыканскай падтрымкі.
«Спадзяюся, гэтае галасаванне заахвоціць усіх хаўруснікаў перагледзець свае склады і зрабіць больш», - сказала прэм'ер-міністр Эстоніі Кая Калас.
Міністр замежных спраў Швэцыі Тобіяс Більстрэм дадаў, што цяпер таксама час памятаць, што ЕЗ цяпер павялічыць і ўласную вытворчасць узбраення, боепрыпасаў і паставак, каб дапамагчы Украіне на доўгатэрміновай аснове.
«Сённяшняе галасаванне паказвае неабходнасць гэтага. Мы таксама павінны зрабіць сваю хатнюю працу», – дадаў ён.
Яго чэшскі калега Ян Ліпоўскі паўтарыў гэтае меркаванне, сказаўшы: «Еўропа таксама павінна зрабіць больш. Нашы ваганні і нерашучасць па эфектыўнай падтрымцы Украіны толькі падахвочваюць Крэмль да далейшай агрэсіі, якая каштуе яшчэ больш жыццяў».
Міністр замежных спраў Нямеччыны Аналена Бербок таксама вітала заканадаўчы крок ЗША, сказаўшы: «Гэта дзень аптымізму для Украіны і еўрапейскай бяспекі».
Паводле інфармацыі Politico, вызначальнае выпрабаванне для Еўропы адбудзецца ў панядзелак, 22 красавіка, калі 27 міністраў замежных спраў ЕЗ збяруцца ў Люксембургу, каб спланаваць будучую вайсковую дапамогу Кіеву. Плануецца, што да дыскусіі віртуальна далучацца міністры замежных спраў і абароны Украіны.