Падчас рэстаўрацыі старажытнай царквы ў Полацку знайшлі сенсацыйнае графіці

Фотафакт.

У красавіку падчас рэстаўрацыйных працаў у Спаса-Праабражэнскай царкве Спаса-Еўфрасіннінскага манастыра ў Полацку знайшлі новыя графіці. Адно з іх змяшчае сенсацыйны надпіс, паведамляе Інстытут гісторыі НАНБ.

Дацэнтка БДПУ імя Максіма Танка Іна Калечыц расшыфроўвае надпіс наступным чынам:

«+Пераставіўся (памёр) Аўдакім месяца сакавіка ў першы дзень, папін Святога Спаса. Памяні, Госпадзе, у жыцці вечным. Майстар грэцкага боку».

Майстру і святара Аўдакіма, пра якога ідзе гаворка на графіці і які жыў у часы Еўфрасінні Полацкай, «можна паставіць у адзін шэраг з вядомымі імёнамі дойліда Яна і майстра Лазара Богшы», мяркуюць эксперты Акадэміі навук.

Графіці знайшлі на паўночных дзвярах храма, калі расчысцілі фрагмент сцяны. Памінальны запіс зроблены на пяць радкоў памерамі 17х6,5 см.

Як тлумачаць навукоўцы, храм з'яўляецца сапраўднай «бібліятэкай» надпісаў-графіці – іх колькасць дасягнула чатырох тысячаў. Яны датуюцца перыядам з XII да XIX стагоддзя.

Рэстаўрацыя Спаса-Праабражэнскай царквы Спаса-Еўфрасіннінскага манастыра ў Полацку ўнесеная ў дзяржпраграму «Культура Беларусі» на 2021–2025 гады. Толькі ў 2023 годзе на яе выдаткавалі больш за 1,6 млн рублёў. Працы павінны скончыцца сёлета.

Спаса-Праабражэнская царква пабудаваная ў XII стагоддзі, храм распісаны ўнікальнымі фрэскамі, якія на 90 адсоткаў захаваліся.