«У моладзі дакладна сталёвыя нервы»
9- 1.04.2024, 21:02
- 12,106
Спакойны беларус не спалохаўся, калі заіскрыўся вагон метро, і стаў героем сацсетак.
У Менску раніцай 30 сакавіка адбылося надзвычайнае здарэнне ў метро: у адным з вагонаў заіскрылася падлога, з'явіўся дым, цягнікі на Маскоўскай лініі давялося спыніць. Рух аднавілі праз 20 хвілінаў, а ў МНС патлумачылі інцыдэнт зацісканнем тармазных калодак. Адзін з пасажыраў таго самага вагона зняў момант, калі з-пад падлогі пасыпаліся іскры, – відэа ўжо сабрала больш за мільён праглядаў у TikTok. Карыстальнікі абмяркоўваюць не толькі само надзвычайнае здарэнне, але і хлопца, які быў яго непасрэдным «суседам» і праявіў зайздросную стрыманасць, піша «Люстэрка».
Як адзначыў аўтар відэа, задымленне адбылося на пераездзе паміж станцыямі метро «Кастрычніцкая» і «Плошча Леніна». У нейкі момант у вагоне пачуўся гучны трэск, з-пад люка ў падлозе вылецеў сноп іскраў і паваліў дым.
На шчасце, пасажыраў на гэтым месцы не было. Аднак за пару сядзенняў ад яго знаходзіўся малады чалавек, які адрэагаваў на ўсё з дзіўным спакоем: павярнуў галаву да дымлівага люка і толькі праз некаторы час марудліва ўстаў і адышоў у бок.
Многія карыстальнікі ў каментарах уразіліся вытрымцы менчука і адзначылі, што самі паводзілі б сябе па-іншаму:
«У хлопца нервовая сістэма [супер]. Я б ужо падлогу шліфавала ад пераляку».
«Дзіўлюся спакою беларусаў».
«Можна мне такую ўпэўненасць у жыцці, як у хлопца, які сядзіць».
«У моладзі дакладна сталёвыя нервы».
«Хлопцу гэты свет ужо даўно зразумелы».
Зрэшты, сёй-той выказаў здагадку, што мянчук быў у слухаўках і папросту не паспеў своечасова адрэагаваць на трэск і іскры.
Некаторыя прызналіся, што ў іх развілася новая фобія і яны больш ніколі не будуць сядзець у метро, а іншыя ўвогуле цяпер не хочуць там ездзіць.
Відавочцы інцыдэнту адзначылі, што супрацоўнікі метро і экстранныя службы спрацавалі дакладна і зладжана і не дапусцілі панікі. Аднак у каментарах хапіла і крытыкі – у асноўным лаялі рухомы склад падземкі: маўляў, ён уяўляе з сябе «старызну», якой «месца на сметніку».
Ёсць і тыя, хто перакананы, што нічога страшнага не адбылося: «Ну, бывае! Чалавек ідзе, ідзе і ўпадзе. А тут тэхніка. Дый, мяркуючы з відэа, не небяспечна. Было б небяспечна – звальвалі б, а не здымалі».
Нагадаем, пасля тэракту ў Падмаскоўі ў менскім метро ўзмацнілі захады бяспекі: арганізаванае ўзмацненне дзяжурных зменаў і рэзервовых групаў службы бяспекі метрапалітэна, патруляванне і агляд электрацягнікоў, а ўвесь дзяжурны персанал накіраваны на выяўленне безгаспадарных прадметаў і падазроных асобаў.