Італьянскія знішчальнікі перахапілі самалёты РФ у Балтыйскім моры

Двойчы цягам дня.

Знішчальнікі Ваенна-Паветраных сілаў Італіі Eurofighters цягам гэтага дня ажыццявілі двайны перахоп расейскіх самалётаў над Балтыйскім морам.

Пра гэта паведамляе італьянскае інфармагенцтва ANSA.

Гэтыя знішчальнікі Eurofighters уваходзяць у склад 4-й аператыўнай групы, якая дзейнічае на польскай базе ў Мальбарку.

«Трывога, запушчаная з каманднага цэнтра NATO ва Уэдэме (Нямеччына), была актываваная ўчора і сёння раніцай праз неапазнаны самалёт, які ляцеў над міжнароднымі водамі Балтыйскага мора», – паведамляе агенцтва.

У публікацыі гаворыцца, што пасля ідэнтыфікацыі расейскага самалёта і назірання італьянскія знішчальнікі вярнуліся на сваю базу ў Мальбарку.