Кіраўнік МЗС Латвіі ідзе ў адстаўку

У чым прычына?

Міністр замежных спраў Латвіі Крыш'яніс Карыньш пастанавіў пайсці ў адстаўку. Аб яго пастанове стала вядома пасля яго сустрэчы з прэм'ер-міністрам Латвіі Эвікай Сіліняй, паведамляе Delfi.

Карыньш пакіне пасаду кіраўніка МЗС 10 красавіка, а на наступны дзень - 11 красавіка - Сейм Латвіі можа зацвердзіць новага міністра.

22 сакавіка Генеральная пракуратура Латвіі распачала крымінальны працэс аб магчымай растраце дзяржаўных сродкаў пры выкарыстанні спецыяльных рэйсаў для камандзіровак Карыньша, калі ён займаў пасаду прэм'ера. Гэтае паведамленне выклікала крытыку ў грамадстве.

Дзяржканцылярыя Латвіі падлічыла, што з верасня 2021 да верасня 2023 года з дзяржаўнага бюджэту краіны на такія рэйсы пайшло 613830 еўраў, а разам з часткай выдаткаў, якая кампенсуецца ЕЗ, - 1360000 еўраў. Такім чынам, на спецыяльныя рэйсы з 2021 да 2023 года былі выдаткаваныя сумы, якія перавышаюць прадугледжаныя дамовамі.

Паводле інфармацыі выдання, на пасаду кіраўніка МЗС пасля адстаўкі Карыньша можа быць вылучаная цяперашняя віцэ-спікер Сейма Занда Калніня-Лукашэвіца.