Пасланне для Масквы і Берліна: Financial Times патлумачыла, што стаіць за заявай Макрона
6- 27.02.2024, 21:04
- 13,436
![Пасланне для Масквы і Берліна: Financial Times патлумачыла, што стаіць за заявай Макрона](https://i.c97.org/ai/585401/aux-head-1709057063-20240101_makron_360.jpg)
Сігнал пасланы.
Заява прэзідэнта Францыі Эмануэля Макрона пра магчымую адпраўку заходніх войскаў ва Украіну з'яўляецца часткай спрэчкі паміж Парыжам і Берлінам датычна таго, хто насамрэч больш дапамагае Кіеву. Таксама гэта сігнал «стратэгічнай двухсэнсоўнасці» для Масквы, піша Financial Times (пераклад – «Уніян»).
Увечары ў панядзелак Макрон заявіў журналістам, што на сустрэчы з іншымі заходнімі лідарамі ён абмяркоўваў гіпатэтычную магчымасць адпраўкі войскаў ва Украіну, але «сёння няма кансэнсусу» ў гэтым пытанні. «Але нічога нельга выключаць. Мы зробім усё магчымае, каб Расея не перамагла ў гэтай вайне», – дадаў ён.
За гэтай заявай з усіх куткоў Еўропы пасыпаліся ўдакладненні, пярэчанні і аспрэчанні, якія зводзіліся да таго, што ніхто не гатовы выпраўляць сваіх вайскоўцаў ва Украіну.
Аднак, як адзначае FT, словы Макрона прызначаліся найперш для Берліна і Масквы. Сярод іншага выданне нагадвае, што раней у панядзелак канцлер Нямеччыны Олаф Шольц катэгарычна адпрэчыў магчымасць адпраўкі ракетаў Taurus ва Украіну, спасылаючыся на рызыку эскалацыі. У сваёй заяве Макрон сярод іншага адзначыў, што «некаторыя хаўруснікі» раней гаварылі «ніколі» пра перадачу Украіне танкаў, знішчальнікаў і ракетаў, а прапаноўвалі даслаць «спальныя мяшкі і шаломы».
У гэтым кантэксце паказальна выглядае каментар міністра эканомікі Нямеччыны Роберта Хабека пра словы Макрона.
– Мне прыемна, што Францыя думае, як павялічыць падтрымку Украіны, але я магу даць ёй параду – пастаўляйце больш зброі, – сказаў Хабек.
Нямеччына на сёння з'яўляецца найбуйнейшым еўрапейскім пастаўшчыком зброі для Украіны і ўжо даўно крытыкуе значна больш сціплы фундуш Францыі, якая мае абаронны бюджэт такога ж памеру. Узамен Парыж апраўдваецца тым, што не захоўвае вялікіх запасаў старой зброі, якую можна было б выправіць ва Украіну, і замест гэтага пастаўляе больш складаную зброю, напрыклад ракеты SCALP.
Другі адрасат заявы Макрона – гэта Масква, сцвярджае FT і спасылаецца на высокапастаўленага еўрапейскага чыноўніка ў пытаннях абароны. Ён сказаў, што заява Макрона павінна стварыць дадатковы эфект стрымлівання і двухсэнсоўнасці для Расеі.
– Усе ведаюць, што ва Украіне ёсць заходнія сілы спецыяльнага прызначэння – яны проста не прызнавалі гэтага афіцыйна, – дадаў чыноўнік.