У Латвіі склалі спіс прадукцыі, якую забаронена ўвозіць з Беларусі
12- 24.02.2024, 14:35
- 16,008
![У Латвіі склалі спіс прадукцыі, якую забаронена ўвозіць з Беларусі](https://i.c97.org/ai/412789/aux-head-1614282758-20210225_latwia_360.gif)
Што ў яго ўвайшло?
Міністэрства земляробства Латвіі перадало на ўзгадненне праект правілаў, дзе вызначаны канкрэтныя сельскагаспадарчыя і кармавыя прадукты, якія надалей будзе забаронена ўвозіць у Латвію з Расеі і Беларусі. Пра гэта са спасылкай на інфармацыю на партале прававых актаў паведамляе Tvnet.
Прадугледжваецца, што ў Латвію будзе забаронены ўвоз гароху, пшаніцы, пшанічна-жытняй сумесі, жыта, ячменю, аўса, кукурузы, рысу, збожжавага сорга, грэчкі, проса ды іншых збожжавых прадуктаў расейскага і беларускага паходжання.
Таксама будзе забаронены імпарт соевага бобу, арахісу, копры, насення лёну, рапсу або свірэпіцы, насення сланечніку, іншага насення і пладоў алейных раслінаў, акрамя гарчыцы, мукі і мукі грубага памолу.
Будзе забаронена таксама імпартаваць насенне, плады і споры для пасеву, шышкі хмелю, расліны або часткі раслінаў, якія выкарыстоўваюцца ў асноўным у парфумерыі, фармацэўтыцы або для падрыхтоўкі інсектыцыдаў і фунгіцыдаў і аналагічных мэтаў, струкі ражковага дрэва, марскога ды іншага багавіння, цукровыя буракі, трыснёг, фруктовыя костачкі і ядры, а таксама іншыя раслінныя прадукты, якія выкарыстоўваюцца ў асноўным у прадуктах харчавання.
Нельга будзе імпартаваць таксама збожжавую салому і шалупінне, кармавую бручку, кармавы бурак, кармавыя карані, сена, люцэрну, канюшыну, спаржу насенную, капусту кармавую, лубін, віку і аналагічныя кармавыя прадукты.
У спіс забароненых да ўвозу прадуктаў таксама ўключаныя мука і гранулы з мяса або мясных субпрадуктаў, рыбы або ракападобных, малюскаў або іншых водных бесхрыбтовых, якія не прыдатныя для ўжывання ў ежу чалавекам, жмых, вотруб'е, шрот і іншыя рэшткі, атрыманыя ў выніку прасейвання, размолу або іншай апрацоўкі збожжавых або зернебабовых культураў, рэшткі вытворчасці крухмалу і аналагічныя адкіды, бураковы жом, трысняговы жмых і іншыя адкіды цукровай вытворчасці, багасу і адкіды багасы, жмых і іншыя цвёрдыя рэшткі, якія ўтвараюцца ў выніку вымання соевага алею, арахісавага алею або іншых раслінных або мікробных тлушчаў і алеяў.
Магчыма, будзе забаронены ўвоз вінных асадкаў, вінаградных костачак, адкідаў расліннай сыравіны і раслінных адкідаў, рэштак і пабочных прадуктаў, якія могуць быць выкарыстаныя на корм жывёлам.
Таксама будзе забаронена ўвозіць прадукты для выкарыстання ў кармах для жывёлаў, у тым ліку кармы для сабак і катоў, расфасаваныя для раздробнага продажу.
Раней паведамлялася, што Харчова-ветэрынарная служба Латвіі (PVD) з 24 лютага цягам 6 месяцаў будзе праводзіць узмоцнены кантроль за пастаўкамі прадуктаў харчавання і кармоў з Расеі і Беларусі.
Як растлумачылі ва ўстанове, узмоцнены кантроль будзе праводзіцца, каб ухіліць асцярогі з нагоды рызык для здароўя людзей і жывёлаў, а таксама для забеспячэння адпаведнасці грузаў патрабаванням ЕЗ, у тым ліку для прадухілення ўвядзення спажыўцоў у зман датычна характарыстык, складу, колькасці, тэрміну прыдатнасці, краіны ці месцы паходжання, метаду вырабу ці вытворчасці тавараў.
Надалей не менш як 10 адсоткаў тавараў пэўных групаў, такіх, напрыклад, як гарох, збожжавыя прадукты, алейныя культуры, кармы для жывёлаў, якія паступаюць з Расеі і Беларусі, і не менш як 5 адсоткаў тавараў, якія паступаюць з іншых трэціх краінаў, будуць правярацца не толькі дакументальна, ідэнтыфікацыйна і фізічна, але і праз адбор спробаў для праверкі ў лабараторыі.
Паводле інфармацыі PVD, у 2023 годзе для памежнага кантролю PVD было прад'яўлена 2,5 млн тонаў розных харчовых тавараў, што ўвозяцца з Расеі і Беларусі, уключаючы кармы, збожжа, агародніну, насенне, напіткі, кандытарскія вырабы, каву, гарбату і інш.
Нагадаем, на днях сейм Латвіі прыняў папраўкі да Закона аб сельскай гаспадарцы і развіцці вёскі, якія забараняюць імпарт сельскагаспадарчых і кармавых прадуктаў з Расеі і Беларусі для спажывання ў Латвіі. Згодна з папраўкамі, імпарт гэтых прадуктаў з трэціх краінаў будзе таксама забаронены, калі яны паходзяць з Расеі ці Беларусі. Забарона на імпарт будзе распаўсюджвацца на сельскагаспадарчую і жывёлагадоўчую прадукцыю, якая застаецца ў Латвіі і не закране перавожаную ў іншыя краіны ЕЗ.
Папраўкі прадпісваюць Кабінету міністраў цягам двух тыдняў пасля пачатку дзеяння выдаць нарматыўныя акты, у якіх будуць указаныя сельскагаспадарчыя і кармавыя прадукты, забароненыя да ўвозу ў Латвію з Расеі і Беларусі. Кабінету міністраў таксама даручана да 1 сакавіка наступнага года ацаніць і дакласці Сейму пра ўплыў планаванай забароны на эканоміку і грамадскія інтарэсы.