Дроны падбілі важныя ўстаноўкі на найбуйнейшым металургічным заводзе РФ у Ліпецку
3- 24.02.2024, 11:19
- 9,742
![Дроны падбілі важныя ўстаноўкі на найбуйнейшым металургічным заводзе РФ у Ліпецку](https://i.c97.org/ai/584931/aux-head-1708762785-20240224_lipeck_360.jpg)
Вытворчы працэс спынены.
У ноч на 24 лютага на Наваліпецкім металургічным камбінаце ў РФ прагрымелі магутныя выбухі. Расейскія ўлады паскардзіліся на атаку БПЛА.
Пазней стала вядома, што напад на расейскі металургічны камбінат арганізавалі СБУ і ГУР. Пра гэта OBOZ.UA паведамілі ўласныя крыніцы.
Варта адзначыць, што беспілотныя лётныя апараты ўдарылі па важных устаноўках. У выніку атакі вытворчы працэс будзе спынены.
Металургічны камбінат у Ліпецку з'яўляецца адным з найбуйнейшых на тэрыторыі краіны-агрэсаркі. Ён працуе на ваенна-прамысловы комплекс РФ і выконвае вялікую колькасць дзяржаўных заказаў.
Паводле інфармацыі крыніцаў, сыравіна з гэтага прадпрыемства ідзе на выраб расейскіх ракетаў, артылерыі, беспілотнікаў і іншых відаў зброі. Таму камбінат быў законнай мэтай для Украіны.
Крыніцы ў спецслужбах адзначылі, што пасля магутных выбухаў на металургічным камбінаце пачаўся маштабны пажар і эвакуацыя персаналу. Таксама вядома, што БПЛА патрапілі ва ўстаноўкі, прызначаныя для першаснага астуджэння неачышчанага коксавага газу. Параза гэтых аб'ектаў прывядзе да спынення ўсяго вытворчага працэсу металургічнага камбіната на доўгі час.
Характэрна, што ўладальнікам гэтага металургічнага камбіната з'яўляецца набліжаны да расейскага дыктатара Пуціна алігарх Уладзімір Лісін. Паводле ацэнак Forbes ён уваходзіць у тройку найбагацейшых людзей краіны-тэрарысткі РФ.
Паводле папярэдніх звестак, да нядаўняга часу на наваліпецкім металургічным камбінаце выраблялася сыравіна для расейскіх кампаній, якія займаюцца ядзернай зброяй і балістычнымі ракетамі.