У Беларусі ўстанавілі новы тып датчыкаў на дарогах
17- 1.12.2023, 19:00
- 26,134
![У Беларусі ўстанавілі новы тып датчыкаў на дарогах](https://i.c97.org/ai/411163/aux-head-1613194309-20210213_zima_360.jpg)
Як яны працуюць?
Начальнік управы аўтамабільных дарог Мінтранспарту Рыгор Глазко заявіў, што ў Гомельскай вобласці ўстанавілі новыя датчыкі на дарогах. Яны павінны заўважаць дзікіх жывёл і папярэджваць пра іх кіроўцаў.
Чыноўнік удакладніў, што агародж уздоўж дарог недастаткова, каб засцерагчы кіроўцаў і жывёл. «Як паказвае практыка, гэтага не зусім дастаткова. У мінулым годзе зацверджаны комплекс мер, які дазволіць мінімізаваць выхад жывёл на праезную частку і колькасць ДТЗ з удзелам дзікіх капытных жывёл», - заявіў Рыгор Глазко, піша БелТА.
Паводле ягоных слоў, у Гомельскай вобласці на трасе М10 месяц таму ўстанавілі датчыкі. «Гэта значыць справа і злева на дарозе ёсць камеры і датчыкі руху, якія ўжо спецыяльна запраграмаваныя. Калі жывёла выходзіць на дарогу, то за 250 м з кожнага боку на табло загараецца інфармацыя аб гэтым. Асабліва гэта важна ў начны час», - распавёў чыноўнік.