Лукашэнка таемна прыняў «закон» аб канфіскацыі маёмасці ў беларусаў

«Закон» апублікавалі сёння ўночы.

У Беларусі з'явіўся закон «Аб канфіскацыі маёмасці». Прымалі яго таемна. Уночы 6 студзеня ён быў апублікаваны на Нацыянальным прававым інтэрнэт-партале.

Партал zerkalo.io коратка распавёў, каго ён можа закрануць, якую маёмасць будуць канфіскоўваць і як.

Адзначаецца, што закон прыняты «з улікам неабходнасці неадкладнага і эфектыўнага рэагавання на існыя пагрозы нацыянальным інтарэсам Рэспублікі Беларусь у рэжыме спецыяльных абмежавальных мер» і накіраваны на «забеспячэнне нацыянальнай бяспекі Рэспублікі Беларусь, яе эканамічнай стабільнасці, абарону правоў і законных інтарэсаў беларускіх юрыдычных і (або ) фізічных асоб, інтарэсаў грамадства і дзяржавы».

Там таксама пазначана, што канфіскацыя адбываецца «паводле матываў грамадскай неабходнасці».

Каго закране гэты закон

Найперш - замежныя дзяржы, але не толькі іх. Калі коратка - то ўсіх, хто праводзіў «непрыязныя дзеянні» або наштурхнуў замежныя дзяржавы на такія дзеянні ў дачыненні да Беларусі. Гэта датычыцца і фізічных і юрыдычных асоб, месца рэгістрацыі пры гэтым значэння не мае, а менавіта:

«афіляваныя асобы - юрыдычныя і (або) фізічныя асобы, прама і (або) ускосна (праз іншых юрыдычных і (або) фізічных асоб), якія парушылі пастанову аб здзяйсненні непрыязных дзеянняў або ўплывалі на прыняцце такой пастановы замежнымі дзяржавамі <…> а таксама юрыдычныя і (або) фізічныя асобы, якія залежаць ад пастаноў асоб з такіх дзяржаў і ўключаны ў пералік, вызначаны Саветам Міністраў Рэспублікі Беларусь»;

«асобы з замежных дзяржаў, якія чыняць недружалюбныя дзеянні, — замежныя асобы, звязаныя з замежнымі дзяржавамі <…> якія чыняць непрыязныя дзеянні ў дачыненні да беларускіх юрыдычных і (або) фізічных асоб <…> і асобы, якія знаходзяцца пад кантролем названых замежных асоб, незалежна ад месца іх рэгістрацыі або месца пераважнага вядзення імі гаспадарчай дзейнасці».

Пры гэтым у законе не пазначана, якія менавіта дзеянні падпадаюць пад паняцце «непрыязных» і як вызначыць, ці знаходзіцца асоба «пад кантролем замежных асоб».

Але зазначаецца, што канфіскацыя маёмасці будзе адбывацца «выключна ў якасці меры ў адказ пры ўчыненні ў дачыненні да Рэспублікі Беларусь, яе юрыдычных і (або) фізічных асоб непрыязных дзеянняў».

Які механізм канфіскацыі маёмасці

Пазначана, што падставай для канфіскацыі аб'ектаў права ўласнасці з'яўляецца «учыненне ў дачыненні да Рэспублікі Беларусь, яе юрыдычных і (або) фізічных асоб.

непрыязных дзеянняў».

Пастанова аб неабходнасці канфіскацыі прымаецца ўрадам. Пасля гэтага Дзяржаўны камітэт маёмасці павінен звярнуцца ў эканамічны суд горада Менска з заявай.

Суд цягам месяца павінен разгледзець такую заяву. Яго пастанову можна будзе абскардзіць ва «ўстаноўленым законам парадку».

«Канфіскаваныя аб'екты права ўласнасці, у дачыненні да якіх не патрабуюцца

рэгістрацыя і (або) улік, пераходзяць ва ўласнасць Рэспублікі Беларусь з дня

прыняцця пастановы суда», - гаворыцца ў законе.

А напрыклад, грошы - адразу ў рэспубліканскі бюджэт.

Якую маёмасць могуць канфіскаваць?

Здаецца, усю.

У законе пералічаны грашовыя сродкі, акцыі, аблігацыі, каштоўныя паперы, нерухомасць, транспартныя сродкі і «іншыя аб'екты права ўласнасці».

Калі закон увойдзе ў дзеянне?

Закон уваходзіць у дзеянне праз 10 дзён пасля афіцыйнага апублікавання. Але ўраду далі паўгода, каб прыняць меры для яго рэалізацыі.

Адзначым, што гэты законапраект быў прыняты «палатай прадстаўнікоў» і «саветам рэспублікі» 21 снежня 2022 года. Пры гэтым прэс-службы ніжняй і верхняй «палаты парламента», як і дзяржаўныя СМІ, пра яго не паведамлялі.

Не згадвала пра яго і прэс-служба Лукашэнкі, якая старанна анансуе падпісанне ім якіх-небудзь указаў ці законапраектаў.

Законапраект таксама не быў апублікаваны ў спецыяльнай базе на Нацыянальным прававым інтэрнэт-партале, куды рана ці позна трапляюць усе праекты законаў.

Дакумент, які пасля подпісу Лукашэнкі і ягонага афіцыйнага апублікавання атрымаў статус закона, з'явіўся на Нацыянальным прававым інтэрнэт-партале ўночы 6 снежня.